खोज

बुटवल, १६ असार ।

रुपन्देहीको तिलोत्तमा नगरपालिका प्रमुख रामकृष्ण खाणले आफ्नो सेवा–सुविधा बापतको रकम लिदैनन् । सो रकम सरकारलाई फिर्ता पठाएका पनि छैनन् । उनले पाउने उक्त रकम नगरका सामुदायिक विद्यालयमा अध्ययनरत विद्यार्थीलाई छात्रवृत्ति प्रदान गरेका छन् । जसले विपन्न विद्यार्थीहरुलाई पठनपाठनमा सहयोग भएको छ ।

नगर प्रमुख खाणले निर्वाचित भएपछि आफ्नो सेवा–सुविधा बापतको रकम विपन्न विद्यार्थीको छात्रवृत्तिमा लगाउने घोषणा गरेका थिए । त्यही घोषणा अनुसार आफ्नो सेवा–सुविधा बापतको रकम छात्रवृत्तिमा लगाएका हुन् । गरीवी वा विपन्नताका कारण कोही पनि बालबालिका शिक्षाबाट वन्चित नहोउन् भन्ने उद्देश्यले आफ्नो प्रमुखका रुपमा पाउने सुबिधा विपन्न विद्यार्थीलाई छात्रवृत्ति उपलब्ध गराएको नगरप्रमुख खाणले बताए ।

नगरप्रमुख खाणले गत शैक्षिक सत्रमा १ सय ४२ जना विद्यार्थीलाई छात्रवृत्ति प्रदान गरेका थिए । बाल दिवसको अवसर पारेर भदौ २९ मा प्रतिविद्यार्थी ४ हजार रुपैयाका दरले छात्रवृत्ति प्रदान गरेको उनले बताए । छात्रवृत्तिले सामुदायिक विद्यालयमा अध्ययनरत जेहेन्दार विद्यार्थीलाई प्रोत्साहन समेत मिलेको उनले जनाए ।

यसवर्ष पनि सामुदायिक विद्यालयमा अध्ययनरत विपन्न तथा जेहेन्दार विद्यार्थी नगरप्रमुख छात्रवृत्तिको लागि नाम छनोट भइरहेका छन् । उनीहरुलाई समेत आउदो भदौ अर्थात बाल दिवसको अवसरमा छात्रवृत्ति वापतको रकम बाडिने छ ।

छात्रवृत्ति वितरणलाई व्यवस्थित बनाउन नगरपालिकाले कार्यविधि बनाएको छ । विद्यार्थी छनौट तथा व्यवस्थापनका लागि समिति गठन गरेको छ । यसका आधारमा विद्यालय व्यवस्थापन समितिको निर्णय र वडा कार्यालयको सिफारिसको आधारमा जेहेन्दार तथा विपन्न वर्गका विद्यार्थीलाई छात्रवृत्ति प्रदान गर्ने गरिएको नगरपालिकाले जनाएको छ ।

प्रमुख प्रशासकीय अधिकृत नारायण अर्यालले कार्यविधि अनुसार छात्रवृत्ति वितरणको व्यवस्था मिलाएको बताए । स्थानीय तहका पदाधिकारीको सेवा सुबिधा प्रदेश सरकारले तोकिदिने गरेको छ । जसअनुसार नगरपालिका प्रमुखको मासिक सुबिधा ३९ हजार रुपैया छ । यसबाहेक चाडपर्व बापत वार्षिक रुपमा १५ हजार रुपैया पाउछन् । बैठक भत्ता एक हजार रुपैया र दैनिक भ्रमणभत्ता २ हजार तोकिएको छ । नगरप्रमुख खाडले आफू सम्पन्न भएर नभइ शिक्षा प्रतिको लगाव र सेवा भावले आफ्नो सुबिधा विद्यार्थीको शिक्षामा लगाएको बताए ।

यसअघिका नगर प्रमुख वासुदेव घिमिरेले पनि आफ्नो सुबिधाको रकम ४२ वटा सामुदायिक विद्यालयमा अध्ययनरत एक एक जना जेहेन्दार विद्यार्थीलाई छात्रवृत्तिको रुपमा उपलब्ध गराएका थिए ।