कपिलवस्तु, १५ असार मुलुकभरमै मुस्लिम समुदायको बाहुल्यता रहेको कपिलवस्तुमा दोश्रो ठूलो चाड (ईद उल अजहा) बक्राईद धुमधामसंग मनाएका छन । संघिय सरकारले बकरा ईदमा सार्वजनिक बिदा दिएको भन्दै कपिलवस्तुका मुस्लिम समुदायले खुसी मनाउदै ईद मनाए । ईदको अवसरमा कपिलवस्तु नगरपालिका २ स्थित ईदगाह र नगरपालिका वडा नम्बर ३ स्थित इमाम अहमद बिन हम्मल मस्जिदमा सामुहिक नवाज पढि बकरा ईद मनाईएको हो । सो अवसरमा कपिलवस्तु नगरपालिका २ मा रहेको तौलिहवा ईदगाहमा जामा मस्जिद तौलिहवाका मौलाना अली हसन नजामीले धार्मीक बिधी अनुरुप नवाज पढाएका थिए । त्यसै गरि कपिलवस्तु नगरपालिका ३ मा रहेको इमाम अहमद बिन हम्मल मस्जिदमा ५ सय बढि महिलाले सामुहिक नवाज पढेका छन ।
महिलाहरुलाई पर्दा लगाएर छुटटै नवाज पढने व्यवस्था गरिएकोले महिलाहरु बालबालिका सहित नवाज पढन मस्जिदमा पुगेका थिए । यसै अवसरमा मुस्लिम समुदायले जिल्लाको तौलिहवा, चन्द्रौटा, अभिराव, कृष्णनगर लगायतका स्थानमा रहेका ईदगाहमा गई नवाज पढेका छन । मुस्लिम समुदायले इदगाहा, करबला, मदरसाहरुमा विशेष नवाज तथा पाठ गरि घर घरमा खसी, भेडाको बलि दिएर सो पर्व मनाउछन । खसि, रागा लगायतका पशुहरुको कुर्वानी ( बली ) दिई आफन्त नातागोता तथा इष्टमित्र संग खुसी साटेर यो चाड मनाइने गरिन्छ ।
अरबी क्यालेन्डर अनुसार जिलहिज्जा महिनामा पर्ने बक्राईद मुस्लिम समुदायले आज देखि तीन दिनसम्म मनाउने गर्दछन । बकरा ईदको अवसरमा केन्द्र सरकारले सार्वजनिक बिदा दिएकोमा खुसी लागेको जामा मस्जिद तौलिहवाका अध्यक्ष अधिवक्ता रउफ अहमद खाँले बताए । आफुहरुले देश र देशबासीमा सुख, शान्ति र उन्नतीको कामना गर्दे बकरा ईद मनाउन थालेको जामा मस्जिद तौलिहवाका धर्मगुरु मौलाना अली हसन नजामीले बताए । कपिलवस्तु नगरपालिका २ स्थित ईदगाहमा नवाज पढन आएका मुस्लिम धर्माबलम्बी लाई पुर्व मन्त्री बृजेश कुमार गुप्ता, पुर्व प्रदेश शिक्षामन्त्री धर्म बहादुर लाल श्रीवास्तव, लुम्बिनी प्रदेशसभा सदस्य सुधाकर पाण्डेय, कपिलवस्तु नगरपालिकाका प्रमुख सुदिप पौडेल, वडा नम्बर १ का अध्यक्ष जाहिद खाँ, वडा नम्बर २ का अध्यक्ष अशोक कुमार गुप्ता, शैक्षिक व्यक्तित्व गुणाखर गैह्रे लगायतले नवाजस्थलमै पुगेर शुभकामना दिएका थिए ।
२२ चैत्र २०८१, शुक्रबार
