खोज

बुटवल, १४ असार   २५ औ स्थापना दिवसको अवसरमा होटल तथा रेष्टुरेन्ट ब्यवसायी संघ रुपन्देहीले बिहिबार सरसफाई कार्यक्रम गरेको छ । नेपालले तत्कालिन युद्धमा अग्रेज फौजलाई हराउन सफल सामरिक, ऐतिहासिक महत्व बोकेको जितगढीमा सरसफाई गरेको हो ।
कार्यक्रममा बुटवल उपमहानगरपालिका वडा नं १ का वडा अध्यक्ष नरेन्द्र बस्नेतबाट सफाई सुभारम्भ गरिएको थियो । उनले उक्त अवसरमा सामरिक महत्व बोकेको जितगढीको संरक्षणमा पछिल्लोसमय महत्वपूर्ण कामहरु भएको दाबी गरे । धेरै पुरानो संरचना नदीले बगाउने र केही जमिनमा लुकेको उनले बताए । तत्कालिन गोर्खाली फौजहरुले प्रयोग गरेको बाटाको खोजी गर्ने र पर्यटकहरुलाई आर्कषण गराउन सकिने सम्भावनातर्फ ध्यान जानुपर्ने उनको तर्क छ । आफु जनप्रतिनिधि भएको बेला बिसं २०५४ सालमा अतिक्रमण गरेका २८ वटा घर ब्यवस्थापन गरेको समेत बताए ।

संघका अध्यक्ष लेखनाथ भण्डारीले सेवा उद्योगका रुपमा रहेको होटल र पर्यटनलाई जोडेर लैजानुपर्ने बताए । पर्यटकिय क्षेत्रको संरक्षण हुनसके पर्यटक भित्रने र यसबाट आफुहरुको उद्योग चलायमान हुने उनको तर्क छ । स्थापना दिवसको अवसरमा रक्तदानदेखी सरसफाई लगायत सचेतनाका कार्यक्रम गरिएको उनले बताए । जितगढी क्षेत्रमा बादरहरुले फोहोर गर्ने, भाचिएका हागा र भुईमा बढेका झारलाई सफा गरिएको उनले बताए । कार्यक्रममा संघा पुर्वअध्यक्ष समुन्द्र जिसी सहित पदाधिकारी, सदस्यहरुले श्रमदान गरेका थिए ।
नेपाल रेडक्रस सोसाइटी, रक्तसंचार केन्द्र बुटवलको प्राविधिक सहयोगमा बुधबार रक्तदान कार्यक्रम गरि ८० युनिट रगत संकलन गरेको संघका कासस तथा रक्तदान कार्यक्रमका संयोजक बाबुराम अर्यालले बताए । स्थापना दिवसको मुल कार्यक्रम शुक्रबार एशियन पार्टी प्यालेसमा अशक्त र दिर्घरोगी व्यवसायीलाई सम्मान कार्यक्रम गरिने उनले बताए । यसैगरि सोही दिन साउन १५ गते दहि चिउरा खाने कार्यक्रम समेत राखिएको उनले बताए ।