खोज

सिकाइलाई श्रम, श्रमलाई रोजगारी, रोजगारीलाई उत्पादन र उत्पादनलाई आम्दानीसंग जोड्ने उद्देश्य अनुरुप हामीले स्वरोजगारमूलक शिक्षामा जोड दिएको प्रधानाध्यापक डा. पूर्ण भण्डारी बताउछन् । विद्यार्थीको पाँचवटा समुहले ८० रोपनी जमिनमा तरकारी तथा फलफुल खेती गर्दै सिकिरहेका छन् ।

सल्यान, १४ असार ।  सल्यान बागचौर नगरपालिका स्थित जनकल्याण नमुना माध्यमिक विद्यालय थारमारेको ८० रोपनी जमिनमा विद्यार्थीले सिक्दै तरकारी खेती गर्दै आएका छन् । विद्यार्थी आधुनिक तरिकाबाट ताजा तरकारी र फलफुल उत्पादन गर्दै, आफुले उपभोग गर्दै र विक्रि गर्दै आएका छन् । विद्यालयको कृषि फर्ममा लौकाको बोटमा काँक्रा फल्छ, तमाखुको बोटमा गोलभेडा र कागतिको बोटमा सुन्तला फल्छ । यति मात्रै होइन हिमाली क्षेत्रमा फल्ने स्याउ देखी तराइमा फल्ने आँप, लिची र देशका सबै क्षेत्रमा उत्पादन हुने फलफुल र तरकारी यहीँ फलेको देख्न सकिन्छ । हिजो आज विद्यालयको आफ्नै कार्यक्रम सिक्दै कमाउदै अन्तर्गत कक्षा ९ देखी १२ सम्मका कृषि वाली विज्ञान विषय अध्ययन गर्ने विद्यार्थीले फर्ममा लटरम्म तरकारी फलाएका छन् । रहर लाग्दा फलफुल उत्पादन भइरहेका छन् ।
नयाँ र उन्नत जातका टमाटर, काँक्रा, बोडी, भान्टा लगायतका तरकारी तयारी अवस्थामा छन् । उत्पादित तरकारी विद्यार्थीले आफैले खाने, नजिकैको बजारमा समेत विक्रि हुने र प्राप्त आम्दानीबाट कृषि फर्मलाई र खेती विस्तारलाई अझै व्यवस्थित गर्दै लगेको विद्यालयका प्रधानाध्यापक डा. पूर्ण भण्डारी पंकजले जानकारी दिए । स्थानिय व्यापारीहरु फर्ममै आएर समेत तरकारी खरिद गरेर लैजानेगरेका छन् ।
विद्यार्थीले पढ्दै र विहान बेलुकीको समयमा तरकारी र फलफुल खेती गर्दै स्वरोजगारमूलक शिक्षामा जोड दिइएको उनले बताए । ‘सिकाइलाई श्रम, श्रमलाई रोजगारी, रोजगारीलाई उत्पादन र उत्पादनलाई आम्दानीसंग जोड्ने उद्देश्य अनुरुप हामीले स्वरोजगारमूलक शिक्षामा जोड दिएका हौँ,’ डा. भण्डारीले भने । उनका अनुसार विद्यार्थीको पाँचवटा समुहले तरकारी तथा फलफुल खेती गरिरहेका छन् । कृषि बिज्ञ मार्फत नयाँ प्रविधिको प्रयोग गर्दै तरकारी र फलफुल खेती भैरहेको प्रधानाध्यापक डा. भण्डारीले जनाए ।

रहरलाग्दो खेती देखेर फर्म अवलोकन गर्न आउनेहरु पनि दंग पर्छन् । आन्तरिक रुपमा जिल्ला भित्रबाट र जिल्ला वाहिरबाट पनि आधुनिक खेतिको अवलोकन भ्रमण गर्न आउनेहरुको संख्या बढ्दै गएको बिद्यालयले जनाएको छ । यसबाट कृषि पर्यटन प्रवर्द्धनमा समेत टेवा पुगेको छ । विभिन्न प्राविधिक ज्ञान र रोगकिराको समस्या समाधानको उपाय खोज्न किसानहरु बिद्यालय सम्म आउने गरेको प्रधानाध्यापक डा. भण्डारीले जानकारी दिए । रोग किराले असर पुर्याएका विभिन्न बालिनालिका बोट नै ल्याएर परामर्शका लागि स्थानीय कृषकहरु बिद्यालयमा आउने गरेको उनको भनाइ छ । बिद्यालयको आफ्नै जमिन रहेको बताउदै उनले ८० रोपनिमा तरकारी तथा फलफुल खेती भैरहेको र तीन रोपनी क्षेत्रफलमा धान खेती पनि गरिने जानकारी दिए ।