खोज

कपिलवस्तु, १३ असार  कपिलवस्तुको यशोधरा गाउँपालिकाका युवाहरुलाई लागुऔषध दुव्र्यसन तथा ओसारपोसार बिरुद्ध अभिमुखीकरण दिईएको छ । यशोधरा गाउँपालिकाको सामाजिक बिकास शाखाको आयोजना तथा जिल्ला प्रहरी कार्यालय कपिलवस्तुको प्राबिधिक सहयोगमा पालिकाका युवालाई अभिमुखीकरण दिईएको हो । अभिमुखीकरणको प्रशिक्षण गर्दै जिल्ला प्रहरी कार्यालयकी प्रहरी निरिक्षक शैलेश्वरी बोहराले लागु औषधको प्रयोग र ओसारपोसारमा सरिक हुदा युवाहरुको भविष्य नै अन्धकारमा पर्ने गरेको बताईन । सिमावर्ती क्षेत्रमा लागु औषधको दुव्र्यसनी र ओसारपोसारको जोखिम हुने भएकाले युवाहरु सचेत हुनुपर्ने उनले सुझाव दिईन । अभिमुखीकरणमा लागुऔषधका प्रकार, निम्त्याउने जोखिम, ओसारपोसार, लागु औषध ओसारपोसारमा लाग्ने व्यक्तिले भोग्नुपर्ने जोखिम र कारवाही, परिवार र समाजमा पर्न सक्ने असर, नियन्त्रणका लागि युवाले खेल्न सक्ने भुमिका र नागरिक प्रहरी सहकार्यको बिषयमा जानकारी दिईएको थियो । सिमा क्षेत्रमा लागुऔषधको प्रयोग र ओसारपोसारको बढदो जोखिम नियन्त्रण गर्न नागरिक प्रहरी सहकार्य आवश्यक रहेको सिमा प्रहरी चौकी मर्यादपुरका प्रहरी नायब निरिक्षक चित्रबिर केसीले जोड दिए । युवा लागुऔषधको कुलतमा परे उनका परिवार र समाजिक संरचनामै असर पर्ने भएकाले युवा सचेत हुनुपर्ने गाउँपालिकाका लेखा अधिकृत निराजनराज लम्सालले बताए । लागुऔषध बिरुद्धको अभियानमा सबै लाग्नुपर्ने गाउँपालिका उपाध्यक्ष गुन्जादेवी मौर्यले बताईन । पालिकाका युवाहरुलाई लागुऔषध दुब्र्यसन र ओसारपोसार बारे सचेत बनाएर सिमा क्षेत्रमा हुने अपराध न्युनिकरणमा सहयोग पुग्ने गाउँपालिकाका सामाजिक बिकास अधिकृत कृष्णनाथ पाण्डेयले बताए ।