खोज

चन्द्रौटा(कपिलवस्तु), ९ असार ।

कपिलवस्तुको एक विद्यालयमा लागूपदार्थले जीवनमा पार्ने असर तथा कानुनी प्रावधानबारे अभिमुखीकरण कार्यक्रम गरिएको छ । जिल्लाको शिवराज नगरपालिका–२, हल्लानगरस्थित बाल शिक्षा माध्यमिक विद्यालयमा शुक्रबार अभिमुखीकरण गरिएको बालापुर आशा सञ्जालले जनाएको छ ।

वडा अध्यक्ष राम बहादुर चौधरीले पछिल्लो समय लागुपदार्थको दुर्वयसन, रोजगारी तथा प्रेम गरेको देखावटी सम्बन्धले युवा पुस्ता मानव ओसारपसारको दलदलमा फस्दै गएको बताए । यसलाई नियन्त्रण गर्न सबैले हातेमालो गर्न जरुरी रहेको बताउँदै अभिभावकले आफ्नो सन्तानको निगरानी गर्न भूमिका खेल्नुपर्ने जिकिर गरे ।

वडाध्यक्ष राम बहादुर चौधरीले लागूपदार्थ न्यूनीकरण गर्न आफूबाटै सुरुवात गरी प्रतिबद्धता जनाउन जरुरी रहेको बताए । समाज रुपान्तरण गर्न हरेक क्षेत्रबाट हातेमालो गर्नुपर्ने बताउँदै मदिरा बिक्री वितरण गर्ने समय निर्धारण गर्नुपर्नेमा उनले जोड दिए ।

यसैबीच वडा प्रहरी कार्यालय चन्द्रौटाका सहायक प्रहरी निरीक्षक तथा प्रशिक्षक रहेका विक्रम प्रसाद भुसालले कानुनी प्रावधानबारे प्रष्टाउँदै आपराधिक गतिविधिबाट सावधानी अपनाउनुपर्ने बताए । भेटघाट, बर्थडे पार्टी लगायत अन्य क्रियाकलापको नाममा रातीराती अनावश्यक गतिविधि नगर्ने उनले बताए ।

विभिन्न पार्टीकै बहानामा चोरहरुले तस्करी गरिरहेका हुन्छन् जसले गर्दा वास्तविक तस्करलाई प्रहरीले नियन्त्रण गर्न समस्या भएको भुसालको भनाइ छ ।

किडार्क नेपालका सामाजिक विकास अधिकृत बिनोद केवटले लागुपदार्थ नियन्त्रण गर्न अभिभावक सचेत हुनुपर्ने बताए । सामाजिक रुपान्तरणका लागि आशा सञ्जालले गरेको गतिविधि सकारात्मक रहेकोमा उनले प्रशंसा गरे । विरेन्द्र मिश्रा, सञ्जालकी अध्यक्ष लक्ष्मी थारुले लगायतले कार्यक्रमलाई सम्बोधन गरेका थिए । साथै लागुपदार्थ रोकथामका लागि प्रतिबद्धता समेत जनाइएको छ ।