खोज

बुटवल, ५ असार
बैशाख १३ गते बुधबार माथिल्लो सिद्धबाबा नजिकको ड्याम साईडको रहमा एक जना युवा डुबे । गहिरो रहमा डुबेका १५ वर्षका भैरहवाका शिशिर उपाध्यायको समयमा उद्धार नहुदा मृत्यु भयो । साथीसंग उनि पौडी खेल्न आएका थिए । उद्धारमात्र होईन ड्याम साईडको रहमा उनको लास खोज्नसमेत निक्कै कठिन भयो । स्थानिय पौडी खेल्ने युवाहरु धेरै प्रयास गरे तर सफल भएनन । बुटवल उपमहानगरपालिका नगर कार्यपालिकाको अगुवाईमा बर्दियाबाट गोताखोर मगाएर २४ घण्टामा लास निकाल्ने काम भयो । गर्मिमा पौडी खेलेर सितल मनाउन आएका उनी पानीको गहिरो एकिन नगर्दा डुब्न पुगे । उनि दिउँसो २ बजे डुबेका थिए ।

असारको पहिलो हप्ताको शनिबार पनि अर्को एक जना युवाको डुबेर यही मृत्यु भयो । चिडियाखोलाका राजन गौतम सानैबाट पौडी खेल्छन । पाल्पा क्षेत्रमा डुबेर मृत्यु भएका अधिकाशको शव उनले निकालेका छन । उनले डुबेर हराएका १८ बढिको शव निकालेको बताउछन । ‘यो क्षेत्र खतरापूर्ण छ भन्ने जानकारी हुदाहुदै पनि पौडी खेल्दा घटना हुने गरेको छ ।’— उनले भने । कम्तीमा यहाको पालिकाबाट सुरक्षाको लागि एउटा ट्युव हावा भरेर राख्ने वा सुचनामुलक बोर्डहरु राख्नुपर्ने उनको तर्क छ । बुटवल पावर कम्पनीको ड्याम साईड करीब ३५ देखि ४० फिट गहिरो भएको उनको दाबी छ । बिस्तारै अहिले भने यो १५ फिटभन्दा गहिरो नभएको उनले बताए । यहा गहिरो भन्दा पनि ड्याममुनी पानीले खोतलेर बनाएको सुरुङ र रडहरुमा ठोक्किएर मानिसको मृत्यु हुने गरेको उनले बताए ।

राम्ररी पौडी खेल्न नजानेहरु टाउकोमा चोट लागेर बेहोस हुने र निस्सासिएर मृत्यु हुने गरेको उनको दाबी छ । ‘म आफै पनि यहा जान डर लाग्छ ।’— उनले भने । पावर कम्पनीले पहिले यो मर्मत गर्ने गरेको भएपनि पछिल्लोसमयमा खासै चासो नदेखाएको उनले दुखेसो गरे । ‘सरोकारवालाहरु चासो नदिदा जोखिम बढेको छ ।’—उनले भने । पाल्पा खण्डमा झुम्साको भुतखोला, सिद्घबाबा तल कदमबास क्षेत्रमा बढि डुबेर मृत्यु हुने गर्छ ।
यहा हुने घटनाको उद्धारमा खटिने शसस्त्र प्रहरीको टोलीका अनुसार पाल्पा जिल्लामा यस आर्थिक वर्ष २०७९÷०८ मा (२०८० असार २ गते सम्म) पाल्पा जिल्लामा डुबेर २१ जनाको मृत्यु भएको छ । जसमा १० जना पुरुष, २ जना महिला, ५ जना बालक र ४ जना बालिका रहेका छन । यसमध्ये तिनाउ गा.पा. ३ स्थित भुतखोला, ड्याम र तिनाउ खोला क्षेत्रमा ६ पुरुष, एक महिला, २ बालबालिका गरी ९ जना तथा रामपुरको कालिगण्डकी तथा अन्य खोलाहरुमा बाकीको डुबेर मृत्यु भएको तथ्याकले देखाउछ । प्रायजसो आन्तरिक तथा बाह्य (भारतीय) पर्यटकहरु घटनामा पर्ने गरेका छन । पाल्पा जिल्लाको तिनाउ गाउँपालिका वडा नं. ३ मा रहेको तिनाउ खोला ड्याम साईड र भुतखोला पानी पोखरीमा फोटो खिच्ने तथा पौडी खेल्ने क्रममा घुम्न आउने पर्यटकहरु घटनामा परेका छन । रुपन्देही तथा तराईको अन्य जिल्लाबाट घर्मी छल्नको लागि पाल्पा स्थित तिनाउखोलामा पौडी खेल्न आउनेको संख्या बढेसंगै खोलामा डुबी मृत्यु हुनेको संख्या पनि बढ्दो रहेको छ ।