खोज

जिल्लाको कालिमाटीका किसानहरु चैते धान भित्राउन व्यस्त बनेका छन् । राम्रो फलेको भन्दै उत्साहको साथ किसानहरु चैते धान भित्राउन सक्रिय छन् । गत चैत ५ गते धान रोपाई गरेका कालिमाटी गाउँपालिका वडा नम्बर ५ का वडा अध्यक्ष तथा कृषक टोपबहादुर कार्कीले खेतमा धान झपक्क फलेको भन्दै आफूहरुलाई धान भित्राउने चटारो रहेको बताए । आफू लगायत ६ जना किसानले यो बर्ष ६० रोपनी क्षेत्रफलमा चैते धान खेती गरेको बताउँदै उनले भने,–‘कतिपयको धान पाकिसक्यो, कतिपयको खेतमा लहलह बाला झुलेका छन् । हेर्दा खेरी मनै आनन्द हुन्छ । खेतमा पुगेपछि घर फर्कनै बिर्सिन्छु ।’ कालिमाटी ५ बालुवास्थित पैठकका किसान हिजो आज धान काट्ने, सुुकाउने, चुट्ने र घर भित्राउने काममा व्यस्त छन् ।
मान बहादुर खत्री, दल बहादुर खत्री, खिम बहादुर सापकोटा, रप बहादुर राना लगायतका किसानहरुले यस बर्ष चैते धान खे ती गरेका छन् । एक बर्षमा चार बाली उत्रिन्छ । चैते धान भित्राइसके पछि फेरि वर्षे धान खेती सुरु हुने किसानहरू बताउँछन् । वडा अध्यक्ष कार्कीले आफूहरुले खेतमा एक बर्षमा ४ बाली उत्पादन गर्ने गरेको बताए । ‘चैते धान पछि बर्षे धान रोपाइ हुन्छ’, उनले भने, ‘त्यसपछि तोरी खेती हुन्छ । तोरि स्याहारि सकेपछी गहुँ खेती गर्छौं ।’ खेतबारी बाँझै राखेर नेपालमा केही सम्भावना छैन भन्दै कतिपय युवाहरु बिदेशी भूमिमा पसिना चुहाउन जाने गरेको मा वडा अध्यक्ष तथा कृषक कार्कीले आफ्नै माटो मा परिश्रम पोख्ने हो भने मनग्ये आम्दानी गर्न सकिने बताउँछन् । जनप्रतिनिधिको रुपमा नागरिकको सेवासंगै उनले कृषि कर्मलाइ पनि मिहेनतको साथ अघि बढाएका छन् । “मेरो करीव २० रोपनी जमिन छ, त्यसमध्ये १० रोपनीमा धान खेती गरेको छु, बांकीमा गरिएको मकै खेती पनि राम्रै भयो । अब फेरि पुरै खेतमा धान खेती गर्छौं’, कार्कीले भने । यस क्षेत्रका किसानले गत फागुनमा रोपेको मकै पाकेर पनि भित्राइसकेका छन् । शारदा नदि किनारमा रहेका यस क्षेत्रका उर्वर फांटहरमा सिंचाइको समस्या छैन । पछिल्लो बर्ष यता चैते धान खेतिलाइ विस्तार गर्दै लगेका किसानहरु राम्रो धान फल्ने भएपछी उत्साहित छन् । तर पनि धान भित्राउने समय असारको महिना पर्ने र यो बेला झरीको समय हुने भएकाले धान भित्राउदा समस्या हुनसक्ने भन्दै सोचे अनुसार चैते धान खेतीलाइ बढाउन नसकिएको किसानहरु बताउँछन् ।