खोज

दाङ, ३० जेठ ।

नेपाल संस्कृत विश्वविद्यालयको पाँचौं दीक्षान्त समारोहको तयारी पूरा भएको छ । दाङको बेलझुण्डीस्थित विश्वविद्यालयको केन्द्रीय कार्यालय परिसरमा जेठ ३१ गते बुधबार हुने दीक्षान्त समारोहको तयारी पूरा भएको समारोह मूल समिति संयोजक एवं विश्वविद्यालयका उपकुलपति प्रा.डा. यादवप्रकाश लामिछानेले जानकारी दिए ।

शैक्षिक सत्र २०६७ देखि २०७७ सम्म विद्यावारिधी, आचार्य, शास्त्री, आयुर्वेद स्नातक, एकवर्षे शिक्षाशास्त्रीमा उत्तीर्ण ४ हजार ७ सय ७३ विद्यार्थीमध्ये दीक्षित हुनका लागि आवेदन दिएका ५ सय ७५ जना दीक्षार्थी दीक्षित हुने परीक्षा नियन्त्रक डा. बाबुराम आचार्यले जानकारी दिए । उनका अनुसार बिहान साढे ११ वजेदेखि सुरु हुने समारोहमा ६२ जना विद्यार्थीलाई स्वर्ण पदकले सम्मान गर्ने कार्यक्रम रहेको छ ।

समारोहमा विश्वविद्यालयका सहकुलपति नेपाल सरकारका शिक्षा, विज्ञान तथा प्रविधि मन्त्री अशोककुमार राई, नेपाल संस्कृत विश्वविद्यालयका सभासदहरु, लुम्बिनी प्रदेशका प्रदेश प्रमुख अमिक शेरचन, मुख्यमन्त्री डिल्लीबहादुर चौधरी, पूर्व मुख्यमन्त्रीहरु, प्रदेश सरकारका मन्त्रीहरु, जिल्लाबाट निर्वाचित संघ र प्रदेश सभाका सदस्यहरुको उपस्थिति रहने उपकुलपति प्राडा लामिछानेले जानकारी दिए । दीक्षान्त समारोहलाई भव्य एवं सभ्य बनाउन सम्पूर्ण जिल्लाबासीमा विश्वविद्यालयले अपिल गरेको छ ।

विश्वविद्यालयका कुलपति एवं प्रधानमन्त्री पुष्पकमल दाहाल ‘प्रचण्ड’ को अध्यक्षतामा हुने समारोहमा ५ सय ७५ जना विद्यार्थी दीक्षित हुने कार्यक्रम रहेको उपकुलपति प्राडा लामिछानेले जानकारी दिए । ‘विविध कारणले १२ वर्षदेखि रोकिएको दीक्षान्त समारोह सञ्चालन गर्दैछौं । जेठ ३१ गते हुने समारोह विश्वविद्यालयका कुलपति एवं प्रधानमन्त्री पुष्पकमल दाहालको अध्यक्षतामा तथा सम्पूर्णानन्द संस्कृत विश्वविद्यालय वाराणसीका कुलपति प्राध्यापक हरेराम त्रिपाठीको प्रमुख आतिथ्यमा हुँदैछ ।

यसैबीच समारोहका पाहुनाहरु मंगलबार साँझसम्म दाङ आइपुगेको उपकुलपति कार्यालय प्रमुख उपप्रशासक विनय पोख्रेलले जानकारी दिए । उनका अनुसार प्रधानमन्त्री पुष्पकमल दाहाल ‘प्रचण्ड’ हेलिकप्टरबाट बुधबार बिहान साढे ९ वजे आइपुग्नेछन् भने विश्वविद्यालयका सहकुलपति एवं शिक्षा, विज्ञान तथा प्रविधि मन्त्री अशोककुमार राई, नेपाल संस्कृत विश्वविद्यालयका सभासद, लुम्बिनी प्रदेशका प्रदेश प्रमुख अमिक शेरचन पनि मंगलबार साँझ दाङ आइपुगेका छन् ।