खोज

दाङ, २८ जेठ ।

बिजौरी क्षेत्रको बजार प्रवद्र्धनका लागि यस क्षेत्रमा एकीकृत जग्गा विकास कार्यक्रम लागू गरिने भएको छ । बिजौरी क्षेत्रको बजार व्यवस्थापन र व्यावसायिक प्रवद्र्धनका लागि तुलसीपुर उपमहानगरपालिकाले जग्गा एकीकृत विकास कार्यक्रम कार्यान्वयनका लागि प्रक्रिया अघि बढाएको छ ।

तुलसीपुर उपमहानगरपालिकाका प्रमुख टीकाराम खड्काले यस क्षेत्रको बजार प्रवद्र्धनका लागि बिजौरीको वडा नम्बर १८ र १९ एकीकृत जग्गा विकासक्रम कार्यान्वयनका लागि विस्तृत विवरण प्रतिवेदन (डिपिआर) को काम अघि बढाइएको बताए । बिजौरी उद्योग वाणिज्य संघको दशौ साधारण सभा तथा चौथो अधिवेशनको उद्घाटन गर्दै नगरप्रमुख खड्काले यस क्षेत्रको आर्थिक विकासमा महत्वपूर्ण टेवा पु¥याउनका लागि यातायात कार्यालयलाई दीगोरुपमा व्यवस्थापनका लागि पालिकाकै समन्वयमा आवश्यक पर्ने जग्गाको व्यवस्थापन गरिएको बताए । उनले यातायात कार्यालय व्यवस्थापन हुन नसक्दा सेवाग्राही र सडकसमेत अस्तव्यस्त बन्दै गएकाले तत्कालै सबैको सहयोगबाट यातायात व्यवस्था कार्यालय व्यवस्थापनमा जुट्नुपर्ने बताए ।

खड्काले यस क्षेत्रको समग्र विकासका लागि साल्ट ट्रेडिङ कार्यालय, नेपाल आयल निगमको डिपो कार्यालयको लागि आवश्यक पर्ने जग्गाको व्यवस्थापन पालिकाको तर्फबाट भइसकेको बताए । उनले ऐतिहासिक बिजौरी बजार र तुलसीपुरकै आर्थिक गतिविधि बढाउनका लागि बिजौरी बाँसगढी श्रीचौर होलेरी सडकखण्ड निर्माणमा विशेष ध्यान दिइएको बताए । उनले त्यस सडक खण्डमा पर्ने खोलाहरुमा पालिकाकै बजेटबाट वर्षायाममा यातायात सञ्चालनका लागि आवश्यक भौतिक पूर्वाधार निर्माण गरिएको बताए । खड्काले नेपाल रेडक्रस सोसाइटी बिजौरी उपशाखा र बिजौरी उद्योग वाणिज्य संघले संयुक्तरुपमा निर्माण गरेको सभाहलको समेत उद्घाटन गरेका हुन् ।

कार्यक्रममा प्रादेशिक आयुर्वेद चिकित्सालय विकास समितिका अध्यक्ष कृष्ण बस्नेत, जनता विद्यापीठका पूर्व प्राचार्य ईश्वर पोख्रेल, नेपाल रेडक्रस सोसाइटी दाङ शाखा सभापति मदनकुमार शर्मा, तुलसीपुर उद्योग वाणिज्य संघका अध्यक्ष रामप्रसाद चालिसे, दाङ उद्योग वाणिज्य संघका वाणिज्य उपाध्यक्ष रामप्रसाद पोख्रेल, जनता विद्यापीठका लेखाप्रमुख नवीनकुमार पोख्रेल, नेपाली कांग्रेस तुलसीपुर नगर सभापति सुरेश हमाल, नेकपा एमालेका जिल्ला कमिटी सदस्य शेरबहादुर खड्का, बिजौरी उद्योग वाणिज्य संघका पूर्व सल्लाहकार विष्णु चौधरी लगायतले बोलेका थिए । कार्यक्रममा संस्थाका संस्थापक पदाधिकारी, सल्लाहकारहरुलाई सम्मान गरिएको थियो ।

उद्योग वाणिज्य संघका अध्यक्ष प्रेमनाथ योगीको अध्यक्षतामा भएको कार्यक्रममा उपाध्यक्ष बालकृष्ण रेग्मी, महासचिव विदुर गौतमलगायतले पनि बोलेका थिए ।