खोज

दाङ, २४ जेठ ।

दाङ घोराही –४ वेलभार निवासी पूर्व राज्यमन्त्री महेश चौधरीको निधन भएको छ । केही महिनादेखि सुगर र उच्च रक्तचापका बिरामी रहेका भएका चौधरीको उपचारको क्रममा आज बिहान दाङको राप्ती स्वास्थ्य विज्ञान प्रतिष्ठानमा ७२ वर्षको उमेरमा निधन भएको परिवारले जानकारी दिएको छ ।

महेन्द्र बहुमुखी क्याम्पस दाङमा ६ वर्षको प्राध्यापन पेसा छाडेर उनी ०४१ मा कम्युनिस्ट राजनीतिमा लागेका थिए । २०४८ सालमा उनलाई एमालेले राष्ट्रिय सभामा लगेको थियो । ६ वर्ष राष्ट्रिय सभामा काम गरेपछि २०५४ सालमा उनी स्थानीय विकास राज्य मन्त्री भए । घोराहीस्थित महेन्द्र बहुमुखी क्याम्पसमा प्राध्यापन गर्दागर्दै महेश चौधरी एकाएक राजनीतिमा आकर्षित भए । पार्टीले उनलाई २०६४ ÷ २०६५ मा पनि २६ जनामा फेरि मनोनित गरेर संविधान सभा सदस्य बनायो । त्यो कार्यकाल सकिएपछि भने उनले सक्रिय राजनीति गर्नुभएन बरू कृषि अनुसन्धानमा लागेर घोराही ४ बेलभारमा जैविक मलको कारखाना खोलेका छन् ।

उनले नेपालको तराई तथा यसका भूमि पुत्रहरू, थारू भाषाको पहिलो गीति नाटक ‘छारा’ थारू भाषामा लिरौसी व्याकरण लगायत थुप्रै पुस्तक प्रकाशित छन् । थारू भाषाका व्याकरण, गीति नाटक, थारु लोकसाहित्यमा गुरूबाबा, माघर, झुम्रा, बर्की नाचबारे पनि किताब लेखेका छन् । उनले नेपाली भाषामा लेखेको ‘नेपालको तराई तथा यसका भूमिपुत्रहरू’ नामक किताब चर्चित छ । उनका ‘हिडेन ट्रेजर्स अफ द लो ल्याण्ड नेपाल’ भाग १ र भाग २ पनि प्रकाशित छन् । उनका दुई छोरा,एक छोरी र एक श्रीमती छन् । उनको पुखौैली घर दाङको दगीशरण गाउपालिकाको बैबाङमा आजै अन्तिम दाहसंस्कार गरिएको परिवारले जनाएको छ ।