© २०२३
२८ भाद्र २०८१, शुक्रबार
२८ भाद्र २०८१, शुक्रबार
सल्यान, २४ जेठ ।
धार्मिक तथा पर्यटकीय दृष्टिले महत्वपूर्ण मानिएको सल्यानको त्रिवेणी गाउँपालिकाले ऐतीहाँसिक महत्व बोकेका स्थलको संरक्षणमा चासो देखाएको छ । धार्मिक र ऐतीहासिक महत्व बोकेका स्थलको संरक्षण, विकास र प्रचारप्रसारका लागि गाउँपालिकाले प्रयास थालेको हो । बुधबार त्रिवेणी ५ गैरासल्ले स्थित नर्वदेश्वर मन्दिरमा चारवटा मुर्ती निर्माण गरी अनावरण भएको छ । यस्तै सोही वडा अन्तर्गत जोगजोगिनी पर्यटकीय स्थलको समेत उदघाटन गरिएको छ ।
गाउँपालिका अध्यक्ष खिम बहादुर रावतले नर्वदेश्वर मन्दिरमा शिव, पार्वती, गणेश र साँढेको मुर्ती अनावरण गरेका थिए । धर्म, संस्कृती, परम्परा र इतिहाँसको संरक्षणमा जोड दिदै उनले विभिन्न हिसाबले महत्वपूर्ण मानिएका स्थलहरुको प्रचारप्रसारमा सबैले सहयोग गर्नुपर्ने बताए ।
चालु आर्थिक वर्षमा गाउँपालिकाको वडा तर्फको बजेट अन्तर्गत मन्दिर निर्माण संगै पर्यटकीय स्थलको संरक्षणमा आवश्यक काम गरिएको प्रमुख प्रशासकीय अधिकृत राम बहादुर बुढाले बताए । नर्वदेश्वर मन्दिरमा ३ लाखको लागतमा ४ वटा मुर्ती निर्माण सम्पन्न भएको वडा नम्बर ५ का वडाध्यक्ष विमल रावतले जानकारी दिए । उनका अनुसार जोगजोगिनी पर्यटकीय स्थलमा ३ लाख रुपैयाँ बजेट मध्ये १ लाख ५० हजारको लागतमा जोगि र जोगिनीको मुर्ती तथा बाँकी १ लाख ५० हजार मध्येबाट सिडी, भर्याङ र चौतारा निर्माण गरिएको हो ।
वि.सं.१९८० मा नर्वदेश्वर मन्दिर स्थापना भई पुजा अर्चना गर्न थालेपछि विभिन्न रोग र विपत्तिबाट छुटकारा पाएको स्थानीयहरुको विश्वास छ । यस्तै मन्दिरको दर्शन, अवलोकन, पुजा अर्चना गर्नाले चिताएको कुरा पुरा हुने विश्वास स्थानीयमा रहेको वडाध्यक्ष रावतले बताए । पछिल्लो समय प्रचारप्रसार संगै यसक्षेत्रमा जिल्ला भित्र र दाङ लगायतका छिमेकी जिल्लाबाट समेत मानिसहरु दर्शन, अवलोकनका लागि आउने गरेको उनले बताए ।
सो अवसरमा भजन, कृतन पनि गरिएको थियो । जनप्रतिनिधी, कर्मचारी, स्थानीयहरुले सामुहिक भजनकृतन गरेका थिए । गाउँपालिका उपाध्यक्ष सिता खड्का पुन, निवर्तमान गाउँपालिका उपाध्यक्ष करुणा खड्का, पत्रकार सन्तोष घर्ती लगाएत मुर्ती अनावरणमा सहभागि भएका थिए । नागरिकलाई सकारात्मक परम्परा र धर्मसंग जोड्न मन्दिरमा मुर्ती निर्माण संगै पर्यटकीय स्थलको विकासमा लगानी गरिएको गाउँपालिकाले जनाएको छ ।
© २०२३
सर्वाधिकार सुरक्षित
Design & Developed By:
