खोज

दाङ, २३ जेठ ।

तुलसीपुर उपमहानगरपालिकाका नगरप्रमुख टीकाराम खड्का मंगलबार तुलसीपुर –११ मोतीपुरका किसानले गरेको मकै बारीमा पुगे । उनीसंग विज्ञ टोली किसानको बारीमा पुगेपछि किसान दंग भएका छन् । किसानकै बारीमा पुगेर मकैमा लागेको रोग किरा नियन्त्रण गर्नका लागि कृषि शाखाका प्रमुखलाई लिएर उनी बारीमै पुगेका थिए ।

किसानहरुले प्रविधिको प्रयोग गरेर लाइन बनाएर मकै रोपेका छन् । कृषि शाखाका प्रमुख धनराज गौतमले बारीमा पुगेर मकै खेती हेरेपछि फौजी किराको प्रकोप बढ्न थालेको भन्दै तत्कालै औषधी छर्न आग्रह गरे । यसरी मकै रोप्दा हावा वारपार पास भएर बिरुवा बढ्न र उत्पादनमा समेत टेवा पुग्ने कृषि शाखा प्रमुख गौतमले बताए । उनले खेतीबालीमा लाग्ने रोग किराका विषयमा किसान चनाखो हुन आग्रह गरे । प्राबिधिक ज्ञान लिएर खेती गरेमा क्षती कम हुने उनले बताए ।

यसैबीच फिल्ड अनुगमन तथा अवलोकनका क्रममा नगरप्रमुख टिकाराम खड्काले उपमहानगरले आर्थिक समृद्धिका लागि गर्दै आएको कार्यक्रममा संघ संस्थाहरुले पनि हातेमालो गरेकोमा धन्यवाद दिएका थिए । यसैगरी पालिकासँग समन्वय गरेर गर्नसक्ने आर्थिक समृद्धिका अन्य कार्यक्रमहरु भएमा सधैँ स्वागत गरिने र कृषकहरुको उत्थान र बजारीकरणका सवालमा संस्थाहरुले पनि सक्दो सहयोग गर्नुपर्ने बताए । पालिकाले आगामी दिनमा कृषकहरुलाई सहज होस् भन्नका लागि सहकारी मार्फत बजारीकरणलाई जोड्ने बताउँदै नगरप्रमुख खड्काले आर्थिक प्राबिधिक तथा आधुनिक ज्ञान र सिपका माध्यमवाट कृषकहरुको उत्थानका लागि ग्रामीण महिला उत्थानलाई काम गर्नका लागि अनुरोध गरेका थिए ।

यसैगरी उपप्रमुख स्यानी चौधरीले कृषकहरुको उत्थान तथा आर्थिक समृद्धिका लागि पालिकास्तरीय तथा संघ संस्थाहरुले गर्दै आएको कामलाई एकीकृत प्रणालीबाट समुदायस्तरमा पुर्याउन सकेमा केही परिवर्तन देखिने भन्दै समन्वयका लागि संस्थालाई अनुरोध समेत गरेका थिए । अनुगमन कार्यक्रममा नगरप्रमुख टीकाराम खड्का, उपप्रमुख स्यानी चौधरी, प्रवक्ता माधव वली, वडा नम्बर ११ का वडाध्यक्ष मानबहादुर रावत, प्रशासन शाखा प्रमुख विष्णुकुमारी आचार्य, कृषि शाखा प्रमुख धनराज गौतम, पशु शाखा प्रमुख डा मनोज वलीलगायतको सहभागिता रहेको थियो ।

ग्रामीण महिला उत्थान केन्द्र दाङले जिल्लाका पाँच वटा पालिकामा किसानहरुलाई प्रविधि मैत्री तरिकाले खेतीपाती गर्नका लागि सहयोग, प्राविधिक ज्ञान दिंदै आएको छ । यसै कार्यक्रमलाई प्रभावकारी बनाउनका लागि तुलसीपुर उपमहागरपालिकाका नगर प्रमुख टिकाराम खड्काको संयोजकत्वमा पालिकास्तरीय ९ सदस्यीय परियोजना सल्लाहाकार समिति गठन गरिएको छ । केन्द्रले तुल्सीपुर –११ मोतिपुरमा किसानहरुलाई सुरक्षितरुपमा अन्न भण्डारणका लागि पिस ब्याग हस्तान्तरण गरेको थियो ।
रिपलान्ट परियोजनाका कार्यक्रम संयोजक एचबिथापाले स्वागत तथा कार्यक्रमको उद्देष्यमाथि प्रकाश पारेका थिए । कार्यक्रमको सहजीकरण रिपलान्ट परियोजनाका सुपरभाईजर अर्बिन चौधरीले गरेका थिए ।