खोज

बुटवल, २३ जेठ ।

जुनसुकै राजनैतिक दलले महिलाको सहभागिता स्वीकार गरे पनि नेतृत्व स्वीकार्न नसकेको एक कार्यक्रमका सहभागीहरुले बताएका छन् । उनीहरुले नगरका उपप्रमुखहरुको समाचारले प्राथमिकता पाउन नसकेको गुनासो गरे ।

मंगलबार बुटवलमा सञ्चारिका समुह नेपाल रुपन्देहीले आयोजना गरेको स्थानीय तहका उपप्रमुख र उपाध्यक्ष अन्तर सम्वाद कार्यक्रममा बोल्ने सहभागीहरुले यस्तो गुनासो गरेका हुन् ।

कार्यक्रममा बोल्दै बुटवल उपमहानगरपालिकाका उपप्रमुख सावित्रादेवी अर्यालले समाजमा रहेको पितृसत्तात्मक सोचका कारण काम गर्न असहज भएको बताईन् । उनले उपप्रमुखको जिम्मेवारी धेरै हुने गरेको भन्दै सञ्चार माध्यमहरुमा आफ्ना कामहरुले प्राथमिकता नपाउँदा गरेको कामबारेमा धेरैलाई जानकारी हुन नसकेको बताईन् । तिलोत्तमानगर पालिकाका उपप्रमुख जगेश्वरदेवी चौधरीले तिलोत्तमा नगरपालिकालाई लैगिकमैत्री नगर बनाउनका लागि आफुहरु लागि परेको भन्दै त्यसका लागि सबैको सकारात्मक सहयोग आवश्यक रहेको बताईन् । उनले पत्रकारको कलम जहिले पनि निष्पक्ष ढङ्गबाट चल्नुपर्नेमा जोड दिईन् ।

कार्यक्रममा देवदह नगरपालिका उपप्रमुख विध्यालक्ष्मी गुरुङ्गले भौतिक विकासले मात्र लक्ष्य पुरा हुन नसक्ने भन्दै अब सबै महिलाहरुलाई आर्यआर्जनका लागि जोड्ने काम आफु प्राथमिकतामा राखेको बताईन् ।

सिद्धार्थनगर नगरपालिका उपप्रमुख उमा अधिकारीले उपप्रमुखले गरेको कामको प्रचार हुन नसकेको भन्दै राम्रा समाचार सम्प्रेषण गर्न र गर्नु पर्ने कामका बारे सुझाव दिन आग्रह गरिन् ।

त्यसैगरी गैडहवा गाँउपालिकाका उपप्रमुख माधुरी जैयसवालले सञ्चारकर्मी महिलाहरुलाई सहयोग गर्ने प्रतिबद्धतासगै समाज परिवर्तन गर्न महिलाको भुमिका महत्वपुर्ण रहेको बताईन् । कार्यक्रममा बोल्दै पत्रकार महासंघ रुपन्देहीका अध्यक्ष रामराज पोखरेलले अब स्थानीय तहले पत्रकार महिलाका लागि बजेट विनियोजन गरेर क्षमता बढाउन सहयोग गर्नुपर्नेमा जोड दिए ।
सञ्चारिका समुह लुम्बिनी प्रदेशका अध्यक्ष अमृता अनमोलले उपप्रमुख र सञ्चारकर्मी महिलाबीचको सहकार्य जरुरी रहेको भन्दै कार्यक्रमले एक अर्काबीचको सम्बन्धलाई नजिकबाट बुझ्ने अवसरका रुपमा सबैले लिनुपर्नेमा जोड दिईन् । सञ्चारिका समूह रुपन्देहीका अध्यक्ष निरा गौतमले स्थानीय तहमा रहेर काम गरिरहेका उपप्रमुख र उपाध्यक्षहरुसँगको सहकार्य पत्रकार महिलाका लागि अत्यन्त महत्वपुर्ण रहेकाले कार्यक्रमको आयोजना गरिएको बताईन् । कार्यक्रममा सञ्चारिका समुह रुपन्देहीका सल्लाकार ईन्दिरा अर्याल, रेखा भुषाल, डब्लु डब्लु जे रुपन्देहीका अध्यक्ष कल्पना तिवारी, सञ्चारिका समुह रुपन्देहीका उपाध्यक्ष मिना ढकाल, महासचिवअस्मिना पाण्डेय लगायतले बोलेका थिए ।