खोज

बर्दघाट, २२ जेठ ।

विश्व वातावरण दिवसको अवसर पारेर खानेपानी आयोजना परिसरमा वृक्षारोपण गरिएको छ । बर्दघाट खानेपानी तथा सरसफाई उपभोक्ता सँस्थाको आयोजनामा बाढिपीडित क्षेत्रमा नवनिर्मित आयोजनाको परिसरमा करिव एक सय विभिन्न जातका विरुवाहरु रोपिएको हो ।

आँप, अम्बा, लिचि लगायतका फलफूल सँगै विभिन्न प्रजातिका फूल र अशोकाका विरुवाहरु रोपिएको हो । वृक्षारोपण कार्यक्रमलाई बर्दघाट नगरपालिकाका उप प्रमुख रुद्र प्रकाश उपाध्याय, बर्दघाट नगरपालिकाका सँस्थापक नगर प्रमुख धिरज शर्मा बश्याल, सँस्थाका निवर्तमान अध्यक्ष धातानन्द बश्याल, वर्तमान अध्यक्ष दिपक लम्साल लगायतले सम्बोधन गरेका थिए ।

कार्यक्रममा बोल्दै उप प्रमुख उपाध्यायले पर्यावरणलाई जिवन्त राख्न हरेक क्षेत्रबाट अघि बढ्नुपर्ने बताए । उनले नगरले पनि हरियाली प्रवद्र्धन कार्यक्रम अघि सारेको बताउँदै ग्लोवल वार्मिङ्ग र कार्वन उत्सर्जन कम गर्न रुख विरुवा रोप्नुपर्ने बताए ।

सँस्थापक नगर प्रमुख शर्माले विगतमा पनि नगरले हरित नगरको अवधारणा अघि सारेको बताउँदै नगरका हरेक नागरिक र सँघसँस्थाले हरियाली प्रवद्र्धनमा हातेमालो गर्नुपर्ने बताए । पछिल्लो समय रुखविरुवा रोप्ने र हुर्काउने भन्दा पनि मास्ने काम बढ्दै जाँदा पानीका मुहान समेत सुक्दै जान थालेको बताउँदै वातावरणीय सन्तुलन कायम राख्न रुख विरुवाको महत्व हुने बताए । उनले रोप्नु भन्दा जोगाउनु र हुर्काउन चुनौती रहेको बताउँदै विरुवाको सँरक्षण गर्नु हरेकको दायित्व रहेको बताए ।

सँस्थाका अध्यक्ष दिपक लम्सालले खानेपानी सँस्थाले स्वच्छ पानीको उपलब्धता सँगै सरसफाई र वृक्षारोपण र सँरक्षण सँगसँगै लगिने बताउँदै पानीको मुहानको मुख्य सँरक्षक नै रुखविरुवा र जँगल रहेको बताए । सँस्थाले हरियाली प्रवद्र्धनका लागि सरोकारवाला निकायसँग समन्वय गरी अघि बढ्ने समेत बताएका थिए ।

सँस्थाले राष्ट्रिय सरसफाई सप्ताहको अवसर पारेर हरेक दिन सरसफाई सम्बन्धी विभिन्न कार्यक्रमहरुको आयोजना समेत गरेको सँस्थाका ब्यवस्थापक विष्णु कुमार भुसालले जानकारी दिए ।

कार्यक्रममा सल्लाहकार, कार्यसमिति, लेखा समिति, कर्मचारी, टोल समितिका प्रतिनिधि, स्थानीयवासी र खानेपानी सुरक्षा योजना समिति सदस्यहरुको उपस्थिति रहेको थियो ।