खोज

सुनवल, १३ जेठ ।

लुम्बिनी प्रदेश सरकारका प्रवक्ता तथा आन्तरिक मामिला कानुन तथा सहकारी मन्त्री सन्तोष कुमार पाण्डेयले भारतबाट किसानले रासानियक मल सहज रुपमा ल्याउन सक्ने बताएका छन् । शनिबार पश्चिम नवलपरासीको सदरमुकाम परासीमा लोकतान्त्रीक समाजवादी पार्टी लोसपाले आयोजना गरेको कार्यकर्ता भेटघाट कार्यक्रममा बोल्दै मन्त्री पाण्डेयले सिमा क्षेत्रका सबै जिल्लामा सहज रुपमा मल ल्याउने वातावरण बनाईने बताए ।

लोसपाका लुम्बिनी प्रदेश अध्यक्ष समेत रहेका पाण्डेयले रासायनिक मलको समस्याका विषयमा कार्यकर्ताले कुरा उठाएपछि प्रहरीलाई आँखा चिम्लिन आग्रह गरिसकेको बताएका हुन् । “सबै खुल्ला छ भनेर नभन्ने तर किसानले मल ल्याउँदा शान्त बसिदिने, जनताले आफ्नै हिसाबले मल ल्याउछन्”–मन्त्री पाण्डेयले भने । यस विषयमा आइतबार हुने लुम्बिनी प्रदेशका सुरक्षा प्रमुखहरु संगको छलफलमा पनि आफुले स्पष्ट रुपमा मल ल्याउँदा आँखा चिम्लन सुरक्षा निकायलाई अनुरोध गर्ने मन्त्री पाण्डेले बताए ।

नवलपरासीको सन्दर्भमा सुरक्षा निकायसँंग कुरा भईसकेको बताउँदै मन्त्री पाण्डेयले बाली लगाउने समयमा मल अभावको समस्या समाधान गर्न आवश्यक समन्वय गर्ने बताए । साथै उनले सरकार बजेट निर्माणको क्रममा रहेको बताउदै जनभावनालाई समेटर बजेट ल्याउने बताए । जिल्लाका नेता कार्यकर्तालाई जनताको नजिक भएर काम गर्न निर्देशन दिदै उनले पार्टी एजेन्डा स्थापित गरी ठुलो पार्टी बन्ने तर्फ केन्द्रित हुनुपर्नेमा जोड दिए ।

सो क्रममा लोसपाका केन्द्रीय सदस्य पुरन चौधरीले पार्टीलाई सहि रुपमा अगाडि बढाउनु गम्भीर बन्नुपर्नेमा जोड दिए । पार्टीका नेताहरु जिल्लामा आउँदा थाहा नहुनु दुखद पक्ष भएको बताउँदै चौधरीले यस विषयमा नेतृत्वको ध्यानाकर्षण गराए ।

सो क्रममा लोसपाका नेता कार्यकर्ताले मलखादको समस्या, स्वास्थ्य सेवा, महिला सशक्तिकरण लगायतका विषयमा पार्टी लुम्बिनी प्रदेश अध्यक्षको ध्यानाार्कषण गराएको लोसपाका जिल्ला अध्यक्ष मुकुरजी गिरीले जानकारी दिए ।