खोज

बुटवल, १३ जेठ ।

रक्तसंचार केन्द्र बुटवलमा विभिन्न रक्तसमुहको रगतको अभाव देखिएसंगै जिल्लामा क्रियाशिल स्वयंसेवी संघसंस्थाहरुले नियमित र आकस्मिक रक्तदानलाई जोड दिएका छन् । शनिबार रुपन्देहीमा विभिन्न सामाजिक संघसंस्थाहरुले आधा दर्जन बढी स्थानमा रक्तदान गरेका छन् ।

नेपाल रेडक्रस सोसाईटी, रक्तसंचार केन्द्र बुटवलको प्राविधिक सहयोगमा सामाजिक सेवामा अग्रसर रोटरी ई क्लब अफ मेडिकोफयुजन हाईब्रीड नेपाल, लियो क्लब अफ तिलोत्तमा भृकुटी टाउन र तिलोत्तमा रक्तदाता समाजको आयोजनामा तिलोत्तमा, सुनौलो नेपाल पुरुष जागरण समुहका आयोजनामा चंंकीपुर तथा नेपाल प्रेस युनियनको स्थापना दिवसको अवसरमा बुटवलमा रक्तसंचार केन्द्रको कार्यालयमा रक्तदान भएका छन् ।

सामाजिक सेवामा अग्रसर रोटरी ई क्लब अफ मेडिकोफयुजन हाईब्रीड नेपाल, लियो क्लब अफ तिलोत्तमा भृकुटी टाउन र तिलोत्तमा रक्तदाता समाजको आयोजनामा शनिबार वृहत रक्तदान कार्यक्रम सम्पन्न भएको छ । कार्यक्रमको एक समारोहका बिच तिलोत्तमा नगरपालिका वडा नं. ८ का वडाअध्यक्ष कृष्ण पौडेलले रक्तदातालाई ब्लड ब्याग बितरण गर्दै उद्घाटन गरे । रुपन्देही जिल्ला रक्तदाताको हबका रुपमा विकास भएको भन्दै उनले सामाजिक कार्यमा सबैबाट सहकार्य जरुरी रहेको बताए ।

क्लबका अध्यक्ष डा प्रकाश बस्नेतले संस्थागत उदेश्य अनुसार आफुहरु निरन्तर समुदायमा रहेर विभिन्न स्वस्थ्य, शिक्षा, सशक्तिकरणका अभियान चलाउँदै आएको बताए ।
तिलोत्तमा रक्तदाता समाजका अध्यक्ष गोबिन्द बन्जाडेले रगत अभाव रोक्ने युवाहरुको अगुवाईमा स्थापना भएको समाजबाट नियमित साप्ताहिक साथै आकस्मिक रक्तदानका कार्यक्रम गर्दै आएको बताए ।

कार्यक्रममा वरिष्ठ न्युरोसर्जन चिकित्सक डा.केआई सिह केसी, वरिष्ठ कन्सल्टेन्ट प्रसुति तथा स्त्रीरोग विशेषज्ञ डा.अनुपा थापा, बालरोग विशेषज्ञ डा.सन्तोष पोखरेल, लियो क्लब अफ तिलोत्तमा भृकुटी टाउनका उत्तम पोखरेलले आफनो पेशा ब्यवसायसंगै सामाजिक कार्यमा अग्रसरता जरुरी रहेको बताए । कार्यक्रमलाई नेपथ्य कलेजले प्रायोजन, तिलोत्तमा बिल्डर्स, लायन्स क्लब अफ भलबारी, लायन्स क्लब अफ मणिग्रामको सहआयोजन, रोटरी क्लब अफ तिलोत्तमा रुपन्देही, लायन्स क्लब अफ बुटवल चौतारी, लायन्स क्लब अफ सिद्धार्थनगर युथको सहयोगमा भएको कार्यक्रममा ५२ युनिट रगत संकलन भएको क्लबका अध्यक्ष डा प्रकाश बस्नेतले बताए ।