खोज

बुटवल, १३ जेठ ।

वरिष्ठ पेट, आन्द्रा तथा कलेजो रोग विशेषज्ञ डा. अरुण ज्ञवालीले ५० वर्ष उमेरमाथिका ग्याष्ट्रिकका बिरामीले अनिवार्य इण्डोस्कोपी गर्न सुझाव दिएका छन् । समयमै इण्डोस्कोपी गरिएन र रोग पत्ता लागेन भने त्यसले भविष्यमा क्यान्सर निम्त्याउन सक्ने पनि उनले बताए ।

रोटरी क्लव अफ बुटवलको १४ सय ६३ औं नियमित बैठकमा शनिबार गेष्ट स्पिकरको रुपमा सहभागी डा. ज्ञवालीले यस्तो सुझाव दिएका हुन् । खानपानले मात्र ग्यास्ट्रिक हुन्छ भन्ने भ्रम धेरैमा रहेको भन्दै उनले ब्याक्टेरिया वा तिनले उत्पादन गर्ने विषाक्त पदार्थ, टक्सिन औषधी सेवन जस्ता विभिन्न वस्तुको प्रतिक्रियाका कारण यो समस्या हुने बताए । हेलीकोब्याक्टर पाइलोरी भन्ने ब्याक्टेरिया ग्यास्ट्रिक गराउने महत्वपूर्ण कारण भएको उनले बताए ।

त्यस्तै उनले मदिरा सेवन भन्दा पनि मोटोपनाले कलेजोमा असर गर्ने भन्दै नियमित शारीरिक व्यायाममा ध्यान दिन पनि आग्रह गरे । मदिराको अत्यधिक सेवनले पाचन प्रक्रियासँग सम्बन्धित कलेजो र प्याङक्रियाजमा असर गर्ने र लिभर सिरोसिस, लिभर क्यान्सर, प्याङक्रियाजको क्यान्सर जस्ता रोगहरु लाग्न सक्ने पनि डा. ज्ञवालीले बताए ।

त्यस्तै उनले हेपाटाइटिस “बी“ कलेजोलाई असर गर्ने रोग भएको र समयमै यसको पहिचान गरेर उपचार गरिएन भने सिरोसिस र कलेजोको क्यान्सर जस्ता घातक रोग पनि निम्त्याउन सक्ने उनले बताए ।

उनले आफू शिक्षण अस्पताल महाराजगन्छ छाडेर लुम्बिनी प्रादेशिक अस्पतालमा यस क्षेत्रका बिरामीलाई सेव ागर्नका लागि आएको भन्दै पेट, आन्द्रा तथा कलेजो सम्बन्धी सम्पूर्ण रोगको उपचार अव यहींबाट सम्भव भएको बताए । यसका लागि आवश्यक उपकरण पनि आइसकेको डा. ज्ञवालीले जानकारी दिए ।

त्यस अवसरमा रोटरी क्लव अफ बुटवलका पुर्व अध्यक्षहरु महेन्द्र श्रेष्ठ, आमोद श्रेष्ठ, डिल्लीकुमार श्रेष्ठ, पुर्वअध्यक्ष एवं एजी पुरनप्रसाद श्रेष्ठ, रोटरीयन मणिरत्न पाण्डे, भीमलाल सापकोटा, रोट¥याक्ट क्लव अफ लुम्बिनी बाणिज्य क्याम्पसका अध्यक्ष रिषी पाण्डेलगायतले विभिन्न जिज्ञासा राखेका थिए ।

बैठकमा क्लवका अध्यक्ष बोनिन पियाले क्लवले वर्ष २०२२÷२३ मा भए गरेका कार्यक्रमहरु र अव कार्यकालको बाँकी अवधिमा गर्नुपर्ने कामका बारेमा जानकारी गराएका थिए । त्यस्तै सचिव लालहरि पाण्डेले अघिल्लो बैठकका निर्णयहरुबारे जानकारी गराएका थिए । बैठकमा रोटरीयहरु त्रिभुवन श्रेष्ठ, लेखनाथ पोखरेललगायतले पनि आ–आफ्नो धारणा राखेका थिए ।