खोज

बुटवल, ११ जेठ ।

लैंगिक समानता ल्याउनका लागि अब प्रारम्भिक बाल विकासलाई महत्व दिनु पर्नेमा एक कार्यक्रमका सहभागीहरुले जोड दिएका छन् । उनीहरुले बालविकासबिना सभ्य समाजको परिकल्पना गर्न नसकिने भन्दै अबका दिनमा बाल विकासमा सबै क्षेत्रले लगानी गर्नुपर्ने धारणा व्यक्त गरे ।

विहीबार बुटवलमा प्लान इन्टरनेशनल नेपाल र थारु महिला उत्थान केन्द्रको बालबालिकाको सपना परियोजनाको साझेदारी, सेतो गुराँस बाल विकास सेवा केन्द्र रुपन्देहीको सहजीकरण, बुटवल उपमहानगरपालिका र सामाजिक विकास मन्त्रालय लुम्बिनी प्रदेशको आयोजनामा भएको प्रदेशस्तरीय प्राराम्भिक बालविकास रणनीति निर्माणका लागि परामर्श गोष्ठीमा बोल्ने सहभागीहरुले यस्तो बताएका हुन् । सामाजिक विकास डिभिजनका दिवाकर भण्डारीले असल र सफल सन्तानका लागि सबैले प्रारम्भिक बालविकासमा जोड दिनुपर्ने बताए । त्यसका लागि सबै क्षेत्रले लगानी गर्दा पनि बालबालिकाको प्रराम्भिक चरणमा गर्नुपर्नेमा जोड दिए ।

कार्यक्रममा बोल्दै बुटवल उपमहानगरपालिकाका उपप्रमुख सावित्रादेवी अर्यालले बालबालिकाको प्रारम्भिक चरण अत्यन्त महत्वपूर्ण हुने भएकाले आमा र परिवार दुवैको भूमिका महत्वपूर्ण रहेको भन्दै दैनिक जीवनमा लागु गर्न आग्रह गरिन् । उनले धेरै परिवार र आमाहरुलाई यो विषयमा जानकारी नभएका कारणले बालबालिकाको विकासमा बाधा पुग्ने गरेको बताए । उनले आगामी दिनमा बालबालिकाका मुद्दालाई प्राथमिकतामा राख्ने बताईन् ।

कार्यक्रममा प्लान इन्टरनेशनल नेपालका प्राविधिक सल्लाहकार किरण भण्डारीले प्रारम्भिक बालविकासको अवधारणा, महत्व र नेपालमा प्रारम्भिक बालविकासको अवस्थाका बारेमा आफ्नो धारणा राखेका थिए । उनले हाम्रो देशमा बालबालिकाको लगानी सही समयमा हुन नसकेको भन्दै अबका दिनमा जवान युवालाई नभएर बालबालिकामा लगानी बढाएर बौद्धिक बनाउन आवश्यक रहेको बताए ।

कार्यक्रममा बोल्दै सेतो गुराँस बालविकास केन्द्र रुपन्देहीका कार्यकारी प्रमुख सुमित्रा शर्माले अभिभावकले जस्तो व्यवहार ग¥यो बालबालिकामा त्यस्तै प्रभाव पर्ने भएकाले धेरै ख्याल गर्नुपर्नेमा जोड दिईन् । उनले बच्चा गर्भमा रहँदा नै उत्प्रेरणा र सिकाईका विषयमा मनोपरामर्श जरुरी रहेको जानकारी दिईन् ।

गोष्ठीमा समूहगत छलफलबाट निस्केका सुझावहरुलाई रणनीतिक योजनामा समावेश गरिने सेतो गुराँस बालविकास सेवा केन्द्र रुपन्देहीका परियोजना अधिकृत चिरञ्जीवि ज्ञवालीले बताए । प्रदेशस्तरीय प्रारम्भिक बालविकास रणनीति निर्माणका लागि भएको गोष्ठीमा विभिन्न विद्यालयका अध्यक्ष प्रधानाध्यापक, अभिभावक, बुटवल उपमहानगरपालिकाका महाशाखा प्रमुख, कार्यपालिका सदस्य गरेर करिव ४० जनाको सहभगिता रहेको थियो ।