खोज

बुटवल, ५ जेठ ।

विद्यार्थीहरुलाई निर्वाचन प्रक्रियाबारे ब्यवहारिक ज्ञान हुने गरी स्कलर्स होम सेकेण्डरी स्कुलमा विद्यार्थी प्रमुख छनौट निर्वाचन प्रक्रियाबाट गरिएको छ । विद्यालयको वर्ष २०८० का लागि कक्षा ६ देखि १० सम्मका २ जना विद्यार्थी प्रमुखमा छनौटमा १२ जनाको उम्मेदवारी भएपनि प्रजातान्त्रिक पद्धती अपनाएर सिकाई हुने गरी निर्वाचन मार्फत गरिएको विद्यालयका प्राचार्य बाबुराम बन्जाडेले बताए ।

विद्यार्थीहरुलाई निर्वाचन बारे ज्ञान हुने गरी उनीहरु सहभागी रहेको उनले बताए । छात्रहरु सुरज यादव, सन्जय थापा, बिनित बगाले, हेम बहादुर बुढा, चेतन पन्त, सुदिप पराजुली तथा छात्रा समृद्धि बुढामगर, आकृति श्रेष्ठ, पवना कंडेल, स्वेस्ना थापा, प्रविना बस्नेत र कामना राना उम्मेद्वार रहेका छन् । प्रजातान्त्रिक पद्धतीमा एउटै पदमा दुईभन्दा बढी उम्मेदवार भएको खण्डमा निर्वाचन गराउँदै आएको छ । उनीहरु आफनो मतदान चिन्हबारे प्रचार गर्ने, मत माग्ने र मतदान गर्ने जस्ता ब्यावहारिक ज्ञान सिक्न सफल भएको उनले बताए ।

निर्वाचनमा कक्षा ६ देखि १० सम्मका ६ जना छात्र र ६ जना छात्रा गरी १२ जना विद्यार्थी प्रमुखको उम्मेद्वारी रहेको छन् । निर्वाचनमा बहुमत ल्याउने १ छात्र र १ छात्रा विजेता घोषित गरिने विद्यालयका प्रशासन प्रमुख राजु भण्डारीले बताए । निर्वाचनमा विद्यार्थी प्रमुखहरुले कलम, टाई, ग्लोब्स, किताब, स्केल, घडी चुनाव चिन्ह लिएर चुनाव प्रचार समेत गरे ।

आईतबार निर्वाचनको परिणाम सुनाईने र उपविजेताहरुलाई समेत भूमिका प्रदान गरिने उनले बताए । मतदानको क्रममा हुने विभिन्न प्रकिया, मतदान, मतपत्र, मतपेटिका, मत सदर÷बदर हुने अवस्था, चुनाव प्रचार, विजेता, मतदान अधिकृत जस्ता विषयमा समेत उनिहरु ज्ञान लिएका छन् । विद्यालयमा रातो, निलो, हरियो र पहेलो गरी ४ वटा सदनहरुमा क्याप्टेन र सहायक क्याप्टेन भोटकै आधारमा जिम्मेवारी दिईने उनले बताए । प्रमुख निर्वाचन आयुक्त मुनुकान्त क्षेत्रीले निर्वाचन प्रक्रिया, प्रणालीबारे प्रकाश पार्दै मतदान अधिकारका बारेमा जानकारी गराए ।

एक कार्यक्रमका बीच कार्यक्रमको शुभारम्भ गर्दै विद्यालयहरुमा शैक्षिक बाहेक अन्य धेरै गतिविधिहरु गरिदा विद्यार्थीहरुमा सिकाई विकास भएको प्राचार्य बन्जाडेले बताए । यो एउटा विधिको शासन सिकाई गर्ने रुपमा कार्यक्रम गरिएको उनले बताए । कार्यक्रममा बुटवल बसपार्कका बिटका प्रहरी प्रमुख असाई मान बहादुर नेपालीले आवश्यक सुरक्षा ब्यवस्थापनमा सहयोग गरेको विद्यालयका सहायक प्राचार्य टिकाराम गौतमले बताए ।
निर्वाचन प्रक्रियामा ३ सय बढी विद्यार्थीहरुले भाग लिएका थिए ।