खोज

बुटवल, ३ जेठ ।

पार्टी ईभेन्ट बुटवल प्रथम खुला फुटसल प्रतियोगिता आयोजनाबाट बचत रकम युवाहरुले बुटवलको एक अपाङ अनाथ आश्रमलाई सहयोग गरेका छन । बुधबार एक समारोहका बीच पार्टी ईभेन्ट बुटवलका अध्यक्ष अमित गुरुङ, खेल संयोजक मनिष श्रेष्ठ, बारिस रानाले बुटवल उपमहानगरपालिका वडा नं. १५ उजेलापुरमा रहेको लुम्बिनी अपाङ्ग दृष्टिबिहिन अनाथ आश्रमका लिलाराम रोकामगरलाई खाद्यान्न सहयोग गरेका हुन् । आश्रमलाई चामल ७५ केजी, सनफलो तेल १ कार्टुन, आटा १ पेटी, दाल १० केजी खाद्यान्न सहयोग गरेको पार्टी ईभेन्टका बारिस रानाले बताए । युवाहरु माझ आकर्षण बनेको फुटसल खेल आयोजना गरी बचेको रकम सामाजिक कार्यमा लगाएको उनले बताए । ‘हामी खेलकुदप्रतिको दृष्टिकोणलाई समाज फरक ढंगबाट चिनाउन चाहन्छौ’– उनले भने । युवाहरु केवल रमाईलोमात्र नगरी सामाजिक काममा समेत अग्रसर रहेको यो उदाहरण भएको उनले दाबी गरे ।

लुम्बिनी अपाङ्ग दृष्टिबिहिन अनाथ आश्रममा २० जना बालबालिका र १६ जना वृद्धवृद्धाहरु आश्रित रहेका छन् । बैशाख २२ र २३ गते दुई दिनसम्म मोनालिसा फुटसल एरिनामा भएको प्रतियोगिताको उपाधि युनिक एफसीले चुमेको थियो । प्रतियोगितामा विजेता टिमले नगद ३० हजार, कप, मेडल, प्रमाणपत्र तथा उपविजेता टिमले नगद १५ हजार, कप, मेडल, प्रमाणपत्रबाट पुरस्कृत भएका थिए । दुई दिनसम्म चलेको प्रतियोगितामा २० टिमहरु उपाधिका लागि प्रतिष्पर्धा गरेका थिए ।