खोज

दाङ, २९ वैशाख ।

तुलसीपुर उपमहानगरपालिका वडा नम्बर १ मा रहेको बाल प्राथमिक विद्यालयका विद्यार्थीहरुलाई विद्यालय पोशाक वितरण गरिएको छ । स्वावलम्बन वित्तीय संस्थाले सामाजिक उत्तरदायित्व अन्तर्गत विद्यालयमा रहेका ८५ जना बालबालिकाहरुलाई विद्यालय पोशाक हस्तान्तरण गरिएको हो । विद्यालयमा थारु, दलित समुदायका बालबालिकाहरु अध्ययन गर्दछन् ।

सोही विद्यालयमा कक्षा ५ मा अध्ययनरत सर्मिला नेपालीले विद्यालय पोशाक पाएर खुसी भएको बताइन् । ‘घरको आर्थिक अवस्था कमजोर भएका कारण पुरानो पोशाक लगाएर विद्यालय आउने गरेको थिए, अब त फेरीफेरी पोशाक लगाउने छु र नियमित विद्यालय आउँछु’ –उनले भनिन् ।

विद्यालयका प्रधानाध्यापक प्रकाश पाण्डेले विद्यालयमा विपन्न समुदायका बालबालिकाहरु अध्ययन गर्ने गर्दै आएको बताए । उनले विद्यालय पोशाक अनिवार्य भएपनि विद्यालयले उपलब्ध गराउन नसकेको अवस्थामा पोशाक पाउँदा निकै खुसी लागेको बताए । विद्यार्थीहरुलाई विद्यालयले पुस्तक, कापी निःशुल्क रुपमा उपलब्ध गराए पनि पोशाक भने विद्यालय नै आर्थिक रुपमा सबल नभएकाले उपलब्ध गराउन नसकेको उनले बताए । वित्तीय संस्थाका तुलसीपुर शाखा प्रमुख उमेशकुमार भण्डारीले संस्थाले सामाजिक उत्तरदायित्व अन्तर्गत विद्यालयमा पोशाक वितरण गरिएको बताए । उनले समाजमा महिलाहरुलाई आर्थिकरुपमा सबल बनाउने, नेतृत्वमा पु¥याउनुका साथै सामाजिक उत्तरदायित्व अन्तर्गत विभिन्न क्षेत्रमा काम गर्दै आएको बताए ।

नगर प्रमुख टीकाराम खड्काले सामुदायिक विद्यालयको शिक्षा सुधारका लागि सूचना प्रविधि सामग्री हस्तान्तरण, प्रशिक्षण, अक्षर सुधार, दरबन्दी व्यवस्थापनमा विशेष ध्यान दिइरहेको अवस्थामा बालबालिकाहरुका लागि पोशाक, झोला, कापी कलम वितरण गरिनु सकारात्मक कार्य भएको बताए । उनले विपन्न समुदायमै विद्यालय पोशाक हस्तान्तरण गर्दा त्यसले समाजमा सकारात्मक प्रभाव पार्ने बताए । विद्यालयका बालबालिका पोशाक नभएर विद्यालय नआउने वतावरणको अन्त्य गराएर सहयोग गरेकोमा संस्थालाई धन्यबाद दिए । विद्यालय व्यवस्थापन समितिका अध्यक्ष केशव विश्वकर्माको अध्यक्षता कार्यक्रम भएको थियो । कार्यक्रममा वडानम्बर १ का वडाध्यक्ष हुमकान्त सापकोटा, पूर्व वडाध्यक्ष लक्ष्मण भण्डारी, शिक्षाशाखा प्रमुख चक्रबहादुर भण्डारी लगायतले मन्तव्य राखेका थिए ।