खोज

बुटवल, ९ बैशाख ।

नेवारी संस्कृति, संस्कार जगेर्नासंगै सामाजिक कार्यमा अग्रसर नेवार महिलाहरुको संस्था
श्री तिलोत्तमा नेवाः मयजु खलःले स्थापना दिवस रक्तदान गरी मनाएको छ । संस्थाको सातौ वर्षमा प्रवेश गरेको अवसरमा शनिबार दुर्गा मन्दिर परिसरमा रक्तदान गरेको हो ।
कार्यक्रमको बुटवल उपमहानगरपालिका वडा नं ३ का वडासदस्य अमृत खड्काले उदघाटन गर्दै सामाजिक कार्यमा संघसंस्थाहरुको योगदान महत्वपूर्ण रहेको बताए । जातिय पहिचानमात्र नभई नेवार समुदायहरुले मनाउने हरेक पर्व र चाडहरु बैज्ञानिक भएको उनले दाबी गरे ।

कार्यक्रममा संस्थाका अध्यक्ष मिनु श्रेष्ठले सदस्यहरुलाई नेतृत्व र सामाजिक क्षेत्रमा अग्रसरता गराउदै क्षमता विकासमा जोड दिएको बताईन् । सदस्यहरुलाई एक हप्ते आर्ट अफ लिभिङको जीवन जिउने कला, विभिन्न आयमुलक तालिम, नेवारी बाजा बारे तालिम गर्दै आएको उनले बताईन् । विभिन्न चाडपर्वमा कलासंस्कृति जर्गेना हुने गरि समुदायमा नेवारी भेषभुषा र भैरव नाच, लाखे नाच लगायत संस्कृतिलाई नया पुस्तालाई सिकाउने काम समेत भएको उनले बताईन् ।

संस्थाका महासचिव सुनिता श्रेष्ठले संस्कारसंस्कृतिको विषयमा महिलाहरु अगाडी रहेको भन्दै सामाजिक क्षेत्रमा सबैको साथसहयोगका कारण नै धेरै कामहरु गर्न सफल भएको बताईन । नेपाल रेडक्रस सोसाइटी, रक्तसंचार केन्द्र बुटवलको प्राविधिक सहयोगमा भएको कार्यक्रममा ३० युनिट रगत संकलन भएको कार्यक्रम संयोजक महेश्वरी श्रेष्ठले बताईन । संस्थामा हाल रुपन्देही जिल्लाका १ सय ३६ जना नेवार सदस्यहरु आवद्घ रहेका छन ।