खोज

बुटवल, ३ बैशाख ।

लुम्बिनी प्रदेश सरकारले बुटवलस्थित लुम्बिनी प्रादेशिक अस्पताल विकास समितिको अध्यक्षमा अजयमान श्रेष्ठलाई नियुक्त गरेको छ ।

लुम्बिनी प्रदेश सरकार मन्त्रिपरिषद्को बैठकले बुटवल–५ अमरपथ निबासी उद्योगी श्रेष्ठलाई लुम्बिनी प्रादेशिक अस्पताल विकास समितिको अध्यक्षमा नियुक्त गर्ने निर्णय गरेको हो ।

बुटवलका रैथाने बासिन्दा ५३ वर्षीय श्रेष्ठले त्रिभुवन विश्वविद्यालय अन्तर्गत शंकरदेव क्याम्पस काठमाडौंबाट स्नातकोत्तरसम्मको अध्ययन पूरा गरेका छन् । उनी यसअघि रुपन्देही उद्योगसंघको वरिष्ठ उपाध्यक्ष र महासचिवको रुपमा समेत काम गरेका थिए । लुम्बिनी बाणिज्य क्याम्पस बुटवलको पुर्व प्राध्यापक रहेका प्रतिष्ठित उद्योगी श्रेष्ठ रेडक्रस र परिवार नियोजन संघमा आजीवन सदस्य रहेका छन् भने रोटरी क्लव अफ बुटवलमा २००८–००९ मा अध्यक्ष बनेका थिए भने २०१२–१३ मा एसिस्टेन्ट गभर्नर बनेका थिए ।

श्रेष्ठका बुबा पुर्व प्रधानपन्च हुन् । लुम्बिनी प्रादेशिक अस्पताल विकास समितिको अध्यक्षमा नियुक्त भएपछि बुटवल टुडेलाई प्रतिक्रिया दिंदै श्रेष्ठले अस्पतालको कुशल व्यवस्थापनमा आफ्नो मुख्य ध्यान रहने बताए । “बुटवलबासीको नाताले आफ्नो बुटवल आफै बनाउने गरी अगाडि बढ्ने मेरो अठोट छ । यसका लागि सामान्य नागरिकले उपचार गर्ने सरकारी अस्पतालको व्यवस्थापकीय पक्ष सुधार्नु जरुरी छ”–उनले भने ।

श्रेष्ठले सञ्चार उद्यमीको रुपमा पनि महत्वपूर्ण भूमिका निर्वाह गरेका छन् । २०५४ सालदेखि दैनिक जनसंघर्ष, बुटवल टुडे, दैनिकपत्र हुँदै पत्रिकाको संस्थापक प्रवन्ध सञ्चालकको भूमिका समेत निर्वाह गरेका श्रेष्ठले व्यावसायिक पत्रकारिताको विकासमा समेत ठूलो योगदान पु¥याएका छन् ।

त्यस्तै मन्त्रिपरिषदको बैठकले सदस्यमा लक्ष्मी खनाललाई नियुक्ती गर्ने निर्णय गरेको मुख्यमन्त्रीका स्वकिय सचिव अमृत गिरीले जानकारी दिए ।