खोज

बुटवल, २१ चैत ।

शारीरिक र मानसिक रुपमा अपाङ्गता भएकाहरुको आश्रित स्थल बनेको देविनगरस्थित नेपाल अपाङ्ग आश्रम विभिन्न सामाजिक ब्यक्तिहरुको सहयोगमै निर्भर छ । जन्म, विवाह जस्ता उत्सवका साथै मृतकका आफन्तहरुबाट तिथिहरुमा गरिने सहयोग नै आश्रम चलाउने मुख्य श्रोत हो । लुम्बिनी अटोमोबाईल्स एशोसिएशन अफ नेपाल नाडा लुम्बिनीका अध्यक्ष गणेश प्रसाद भट्टराईले आफ्नो जन्मदिनको अवसरमा मंगलबार अपाङ्ग आश्रममा आश्रितहरुलाई मीठो भोजन खुवाए ।

नेपाल अपाङ्ग आश्रम देविनगरमा मंगलबार विशेष कार्यक्रम गरी उनले आमा गिता भट्टराई, श्रीमती सीता भट्टराईसहित संस्थामा पदाधिकारी, सदस्यहरु सहित जन्मदिनमा सामाजिक कार्य गरेर मनाए । संस्थागत र ब्यक्तिगत रुपमा आश्रमलाई भौतिक सहयोग समेत गर्दै आएको भट्टराईले बताए । नाडाका महासचिव रोशन पाण्डेले अपाङ्ग आश्रमलाई निजी क्षेत्रसंगसंगै सरकारबाट समेत सहयोग जरुरी रहेको बताए ।

यता मंगलबार आश्रममा पुगेकी शान्तिचोककी सीता तिवारी बुबाको तिथि पारेर खाना खुवाउन आईन् । तिलोत्तमा नगरपालिका वडा नं. ३ बस्ने उनी खाद्यान्न सामग्री लिएर ईरिक्सामा आएकी थिईन् । बुबाको ४५ दिनको तिथिको अवसरमा थोरै सहयोग गरेको उनले बताईन् । आश्रममा उनी पहिलोपटक भने होईनन्, वर्षभरि नै विभिन्न अवसरमा सहयोग गर्दै आएको उनले बताईन् ।

आश्रमका उपाध्यक्ष लोक बहादुर थापाले शारीरिक र मानसिक अपाङ्गताहरुप्रतिको दृष्टिकोण परिवर्तन हुन जरुरी रहेको बताए । अपाङ्गताकै कारण घरपरिवारबाट अपहेलित हुनुपरेकाहरुलाई आश्रय दिदै आएको छ । अहिले आश्रममा दैनिक उपभोग्य सामग्रीको अभाव रहेको सचिव हिमा गौतमले बताईन् । न्युनतम दैनिक १५ हजार रुपैयाँ बराबर खर्च हुने गर्दछ । जन्मदिन, विवाहउत्सव, विभिन्न तिथिहरुमा दाताहरुको सहयोगमा आश्रम चलेको छ । हाल आश्रममा ४० जना आश्रित छन् । कक्षा नसरी देखि १० कक्षासम्म प्रगति मावि, गाग्री बोर्डिङ, मणिमुकुन्द स्कुलमा अध्ययन गर्ने ८ जना यहाँ आश्रित छन् ।