खोज

दाङ, १८ चैत ।

पुस्तक तथा स्टेशनरी व्यवसायी समिति दाङले एक लाख एक सय ११ रुपैयाँको अक्षयकोष स्थापना गरेको छ । पठन संस्कृतिको विकास गर्न वौद्धिक प्रतिभा पुरस्कार स्वरुप अक्षयकोष कार्यविधि अनुसार दाङको सबैभन्दा पुरानो सर्वाेदय पुस्तकालय तथा वाचनालयमा अक्षयकोष स्थापना गरिएको हो ।

हरेक वर्ष वसन्त पन्चमीको अवसरमा एक जनालाई वौद्धिक प्रतिभा पुरस्कार प्रदान गर्न स्थापना गरिएको पुस्तक तथा स्टेशनरी व्यवसायी समिति दाङका अध्यक्ष शंकर शर्माले जानकारी दिएका छन् ।

सर्र्वोदयमा एक कार्यक्रमको आयोजना गरी अक्षयकोषको चेक सर्वोदय पुस्तकालयका अध्यक्ष सुशील गौतमलाई हस्तान्तरण गरिएको हो । सम्झौता पत्रमा उल्लेख भएका विषय बारे पुस्तक तथा स्टेशनरी व्यवसायी समितिका पूर्वअध्यक्ष घनश्याम बरालले जानकारी गराएका थिए ।

कार्यक्रममा पुस्तक व्यवसायी समितिका संस्थापक अध्यक्ष देवीप्रसाद गुप्ताले पठन संस्कृतिको विकास गर्न र पाठक संख्या बढाउन यस प्रकारको अभियानले जोड्ने विश्वास व्यक्त गरे । दाङमा सबैभन्दा पहिले स्थापना भएको सर्वेादय पुस्तकालयमा बिभिन्न पुस्तकहरु रहेका छन् । सरकारी तथा निजी विद्यालयका विद्यार्थी फुर्सदको समयमा पुस्तकालयमा अध्ययन गर्न आउने गरेको पुस्तकालयका अध्यक्ष सुशील गौतमले जानकारी दिए । पछिल्लो समय पठन संस्कृतिमा कमी आएको समयमा पठन संस्कृतिको विकाश गर्न सहयोग पुगेको उनले बताए । पुरस्कार स्थापनाले पुस्तकालयलाई सबैको साथ सहयोग आबश्यक रहेको बताए ।

सल्लाहकार शम्भु गौतमले अक्षयकोष स्थापना गरेर गौरवको अनुभुती भएको बताए । दाङमा पठन संस्कृतिमा पुस्तक व्यवसायीको जिम्मेवारी र दायित्वलाई सही ढंगले निर्वाह गरेकोमा धन्यवाद दिए । कार्यक्रमको सहजीकरण कार्यसमिति सदस्य सुन्दर गौतमले गरेका थिए ।