खोज

सल्यान, ७ चैत ।

सल्यानको एक किराना पसलमा आगलागी हुँदा पाँच जना घाइते भएका छन् । जिल्लाको कुमाख गाउँपालिका वडा नम्बर ४ भण्डारखोला स्थित शंकर रानाको एक तले कच्ची घरमा रहेको किराना पसलमा सोमबार राति आगलागी हुँदा पाँच जना घाइते भएका हुन् । घाइते मध्ये चारजनाको अवस्था गम्भीर छ ।

आगलागीमा परेर पसलमा बसिरहेका पसल संचालक २४ वर्षीय शंकर राना, सोही ठाउँका २६ वर्षका यज्ञ राना, २१ वर्षका जीवन राना, २० वर्षका संजीव शाह र १८ वर्षका क्षेत्रमणी राना घाइते भएको जिल्ला प्रहरी कार्यालय सल्यानले जनाएको छ । जलेर घाइते भएकाहरुलाइ एम्बुलेन्स मार्फत रुकुम पश्चिम लगिएकोमा थप उपचारको लागि नेपालगन्ज रेफर गरिएको थियो । घाइते मध्ये गम्भीर चार जनालाई उपचारका लागि भारत पठाइएको प्रहरीले जनाएको छ । घाइतेमध्ये गम्भीर चारजनालाई नर्सिङहोम नेपालगंज बांकेमा उपचार पश्चात थप उपचारका लागि भारतको लखनउ लगिएको जिल्ला प्रहरी कार्यालय सल्यानका प्रवक्ता सन्तोष खनालले बताए । उनीहरुको शरिरको सम्पुर्ण भाग जलेको र बोल्न नसक्ने अवस्थामा रहेको प्रहरीले जनाएको छ ।

घाइते मध्येका एकजना क्षेत्रमणीलाई भने नर्सिङहोम नेपालगञ्ज बाँकेबाट डिस्चार्ज गरिएको छ । आगलागीबाट किराना पसलको सामान जलेर नष्ट भएका छन् । पसलमा आगलागी कसरी भयो भन्नेबारे खुल्न नसकेको र अनुसन्धान भैरहेको प्रहरीले जनाएको छ ।