खोज

सन्धीखर्क, २४ फागुन ।

लुम्बिनी प्रदेश सरकारका खानेपानी ग्रामीण तथा सहरी विकासमन्त्री चेतनारायण आचार्यको घरमा मंगलवार राती तोडफोड गरी चोरी भएको छ ।

सन्धिखर्क नगरपालिका हटारीमा रहेको घरमा मंगलवार राती तोडफोड गरी चोरी भएको प्रहरीले जानकारी दिएको छ । दाङको देउखुरीमा बस्ने मन्त्री आचार्य राष्ट्रपति चुनावका लागि काठमाडौं गएको र घरमा बस्ने श्रीमति दीपासमेत काठमाडौं गएको समयमा कोही नभएको मौका छोपी चोरी भएको प्रहरीले जनाएको छ । घरमा रहेका सम्पूर्ण कोठाहरुको ताल्चा फुटाएर चोरी गरिएको प्रहरी नायब उपरीक्षक मुकुन्द रिजालले बताए । आचार्य दम्पती काठमाडौं भएकोले नआउँदासम्म के कति सामान चोरी भएको हो यकिन नभएको प्रहरी नायव उपरीक्षक रिजालको भनाई छ ।

प्रहरीका अनुसार घरका सबै कोठाका ताला फोडेको देखिन्छ । अहिले प्रहरीले घरलाई सुरक्षा दिएको छ । मन्त्री आएपछि के कति सामान चोरी भएको हो भन्नेबारे विवरण संकलन गरिने रिजालले बताए ।

महिना दिनअघि पनि मन्त्री आचार्यको घरका चोरी भएको थियोे । त्यतिबेला धेरै क्षति भने भएको थिएन । चोरी भएको घटनाको बारेमा अनुसन्धान भइरहेको उनले बताए । चोरीको घटनाका कारण वरिपरीका बासिन्दाले असुरक्षित महसुस गरिरहेको बताएका छन् ।

आन्तरिक मामिला, कानुन तथा सहकारी मन्त्रालयको जिम्मेवारी सम्हालेका मन्त्री आचार्यले बिहीबार हुने राष्ट्रपति चुनावमा भाग लिएपछि घरमा फर्किने बताएका छन् । आचार्य एमालेका केन्द्रीय सदस्य तथा अर्घाखाँची जिल्लाका सह–इन्चार्ज समेत रहेका छन् ।