खोज

बुटवल, २२ फागुन ।

श्री नेवाः पुचः (नेवा समाज विकास परिषद) को आयोजनामा सामूहिक होली मिलन कार्यक्रम मनाईएको छ । रुपन्देहीमा रहेका नेवार समुदायका संघसंस्थाहरुको संयुक्त सहभागितामा प्रतिनिधिमुलक होली मिलन कार्यक्रम मनाइएको हो ।

फागु पुर्णिमाको महत्वलाई जोगाउने गरी नेवार समुदायबीच कार्यक्रम गर्दै आएको पुचका अध्यक्ष काजीमान श्रेष्ठले बताए । ‘परम्परासंगै एकआपसमा सद्भाव र सम्मान बढ्छ’–उनले भने । नया पुस्तालाई नेवा संस्कृति र संस्कारको पहिचानसंगै जगेर्ना र संरक्षणमा कार्यक्रमहरु उपलब्धि मुलक भएको उनले बताए । मानव संस्कार र वातावरणसंग जोडिएका विभिन्न पर्वहरुलाई वर्षभरि विगतबाट नै निरन्तर मनाउदै आएको उनले दाबी गरे । दाताहरुको सहयोग र सद्भावका कारण संस्थागत विकास गर्न सफल भएको भन्दै पछिल्लो समय पुचमा ८ सय भन्दा बढीले सदस्यता लिईसकेको बताए । नेवा पुचको किरियापुत्री भवन सबैको साझा भएको हुँदा यसमा सबैको साथ र सहयोग निरन्तर जरुरी रहेको उनले बताए ।

कार्यक्रममा बुटवल उपमहानगरपालिकाका प्रमुख खेलराज पाण्डेले स्थानीय सरकार सबै जाति, धर्म, लिंग र परम्पराको जगेर्ना गर्ने गरी वार्षिक योजना बनाएको बताए । आदीबासीहरुलाई र अन्य ११ जातिहरुलाई समेटेर वार्षिक बजेट छुट्टाएको उनले बताए । नेवार समुदायहरु नगरमा तेस्रो बढी जनसंख्या भएका समुदायमा पर्ने उनले बताए । जातिय पहिचान, भाषिक संरक्षण, भेषभुषाको विषयसंगै समग्र नगरको समृद्धिमा ध्यान दिनुपर्ने उनले सुझाव दिए । समृद्ध बुटवल, सबल आर्थिक केन्द्र बनाउने अभियानमा सबै जाति, धर्म र समुदायको सहयोग जरुरी रहेको उनले बताए । यसका लागि सबैको सल्लाह र सुझावलाई समेटेर आफू अगाडि बढ्ने प्रतिवद्घता जनाए । कार्यक्रममा सहभागीहरुले फागुन संस्कृतिका नेवारी गान समेत गाएका थिए ।

निवर्तमान अध्यक्ष ज्ञानु लिगलले कृष्ण मन्दिरमा होली पर्व मनाउने प्रचलन शुरुवात गरेको स्मरण गर्दै यसको निरन्तरता महत्वपूर्ण भएको बताईन् । आगामी दिनमा सबै नेवार समुदायका परिवारहरु समेत समेटेर भब्य कार्यक्रम बढ्न सुझाव दिईन् ।

कार्यक्रममा वडा नं. १ का वडाअध्यक्ष नरेन्द्र बस्नेत, वडा नं. ९ का प्रदिप श्रेष्ठ, समाजसेवी चिरञ्जीवी जोशी, सचिव लक्ष्मी श्रेष्ठ, सहसचिव मोतिप्रसाद श्रेष्ठले होलीको महत्वलाइ प्रकाश पार्दै यसलाई सोही अनुसार भब्य र सब्य रुममा मनाउनुपर्ने सुझाव लिए । कचको भवन निर्माणका लागि श्रीमती जमुना प्रधान, छोराहरु नवीन प्रधान र प्रविण प्रधानले १ लाख २५ हजार रुपैया रकम सहयोग हस्तान्तरण गरिएको छ ।