खोज

बुटवल, २० फागुन ।

रोटरी क्लव अफ बुटवलको १४ सय ५३ औं नियमित बैठक सम्पन्न भएको छ । बैठकको एजेण्डा गेष्ट स्पीकर रहेको थियो ।

क्लवका अध्यक्ष बोनिन पियाको अध्यक्षतामा बसेको बैठकमा गेष्ट स्पीकरको रुपमा अपाङ्ग संघ रुपन्देहीका व्यावसायिक विकास अधिकृत रमेश पोखरेल उपस्थित थिए ।

त्यस अवसरमा बोल्दै उनले अपाङ्गता भएका व्यक्तिहरुलाई राहत भन्दा पनि अवसरको खाँचो रहेको भन्दै रोटरी जस्ता सामाजिक संस्थाहरुले उनीहरुलाई आत्मनिर्भर बनाउनेतर्फ रचनात्मक सहयोग गर्नुपर्नेमा जोड दिए ।

उनले अपाङ्गता भएका व्यक्तिहरुलाई रोजगारीमा जोड्न आफ्नो संस्थाको तर्फबाट हुन सक्ने सबै सहयोग उपलब्ध गराउन तयार रहेको भन्दै यसका लागि रोटरीयनहरुले पनि सहयोग गर्नुपर्ने बताए । रोटरीले विश्वभरबाट पोलियो उन्मुलन गर्न सफल भएको र अहिले पनि पोलियोकै कारण थुप्रै व्यक्तिहरुले अपाङ्गता भएर कठिन जीवनयापन गरिरहेको भन्दै पोखरेलले सबैखाले अपाङ्गता भएका व्यक्तिहरुलाई अवसर दिन नसकेपनि रोटरीले कम्तमिा पनि पोलियोकै कारण अपाङ्गता भएकाहरुलाई अवसर दिने गरी योजना बनाउन सुझाव दिए ।

बैठकमा रोटरी इन्टरनेशनल डिष्ट्रिक ३२९२ का डिष्ट्रिक गभर्नर इलेक्ट राजेन्द्रप्रसाद ध्वजूले रोटरीको डिष्ट्रिक कन्फ्रेन्सबारे जानकारी गराएका थिए । उनले डिष्ट्रिक कन्फ्रेन्स रोटरीको एउटा महत्वपूर्ण पर्व रहेको भन्दै यसले देशभरीका रोटरीयनहरुसँग फेलोसिपको अवसर प्रदान गर्ने बताए । ध्वजूले डिष्ट्रिक कन्फ्रेन्समा सहभागी हुन बुटवलका रोटरीयनहरुलाई आग्रह गर्दै महत्वपूर्ण अवसर नगुमाउन आग्रह गरे ।
बैठकमा रोटरीयनहरु लालहरि पाण्डे, दया भण्डारी, जीवकान्त काफ्ले, करुण खनाललगायतले पनि आ–आफ्नो धारणा राखेका थिए । बैठकपछि रोटरीयनहरुबीचमा होली मिलन समारोह गरिएको थियो । रोटरीयनहरुले आपसमा टिका लगाएर होली मिलन गरेका थिए ।