खोज

रुपन्देहीको मैनहियामा रहेको अर्घाखाँची सिमेन्ट उद्योगमा भएको आगलागीबाट चारजना मजदुरको मृत्युको विषय सार्वजनिक नगर्ने प्रहरी प्रशासनको मौनताप्रति अहिले सर्वत्र चासो र चिन्ता देखिएको छ । सामान्य समाचारलाई ठूलो महत्व दिएर सार्वजनिक गर्ने प्रहरी प्रशासनले मजदुरको मृत्युको घटना किन ढाकछोप ग¥यो ? भन्ने प्रश्नको जवाफ दिनुपर्दछ । प्रहरीको सूचना लुकाउने प्रयासले आम नेपाली नागरिकको सूचना पाउने अधिकारमात्र बञ्चित भएको छैन, प्रहरीको भूमिकामाथि पनि प्रश्न उत्पन्न भएको छ । भारतबाट नेपाल आएका कुखुराको अण्डा र चल्ला छोप्दा फोटो समेत राखेर समाचारका लागि आग्रह गर्ने प्रहरीले चार चारजना मजदुरको मृत्यु हुँदा किन मौन ? प्रश्न उत्पन्न भएको छ । यो घटनालाई भित्रभित्रै मिलाउने प्रयासमा प्रहरीको सहयोग देखिएको छ । घटना माघ १६ गतेको थियो । आगोले जलेर घाईते भई ज्यान गुमाएका मजदुरको घटनाको बिषय एक महिनापछिमात्र बाहिर आएको छ । यद्यपि प्रहरीले यसलाई नियोजित नभई जानकारी दिन छुट हुन गएको भनेको छ । तर, रुपन्देही प्रहरीले त्यो भनेर छुट पाउने अवस्था छैन । प्रहरीको यो भनाईमा आम नागरिकले विश्वास गर्ने अवस्था छैन । अर्कोतर्फ आगलागीको घटना रहस्यमय हुनसक्ने आशंका छ । यो घटनाका पछि थुप्रै बिषय लुकेको हुनसक्छ । त्यसको खोज अनुसन्धान जरुरी छ । रुपन्देही प्रहरीले घटनाको पुष्टी त गरेको छ तर घटना बाहिर आएपछि मात्र ।

जिल्ला प्रहरी कार्यालय रुपन्देहीले घटना सार्वजनिक नगर्नुका पछिको बाध्यताका बिषयमा यथार्थ बिबरण सार्वजनिक गरोस् । अर्कोतर्फ स्वयं उद्योगले समेत घटना ढाकछोपको प्रयास गर्नु किमार्थ राम्रो होइन । यसबाट उसको नियतमाथि पनि प्रश्न उत्पन्न हुनु स्वाभाविक हो । घटनाको बिषय र यथार्थ बिबरण सार्वजनिक गरेको भए उद्योगमाथि आम भरोसा हुन्थ्यो तर उद्योगले समेत आफ्नो मजदुरको दुःखद मृत्युको घटना ढाकछोप गर्नु राम्रो होइन । मृतक मजदुरको परिवारलाई उद्योगले क्षतिपूर्ति दियो कि दिएन ? घाईतेको उपचारमा लापरवाही गरियो कि ? यी बिषयमा उद्योगले सत्यतथ्य कुरा सार्वजनिक गरोस् । जिल्ला प्रशासन कार्यालय रुपन्देही यो बिषयमा जानकार थियो होला तर उसले समेत मृतक मजदुरको सतगत, उनीहरुको परिवारको क्षतिपूर्ति, घाईतेको अवस्था, उनीहरुको उपचारको प्रभावकारी व्यवस्थापनका बिषयमा पहल गर्न सक्छ तर अहिलेसम्म उसको मौनताले पनि प्रश्नचिन्ह उत्पन्न भएको छ । अर्कोतर्फ उद्योगमा मजदुरको सामान्य सुरक्षाको समेत ख्याल नगरी आगलागीको घटना भएको पनि हुनसक्छ । त्यसले अरु मजदुरको भविष्यमाथि खेलवाड गरिएको पनि हुनसक्छ । त्यस बिषयमा पनि अव सम्वन्धित निकायको ध्यानाकर्षण होस । मजदुरको नाममा खुलेका मजदुर संगठनहरु समेत घटना सार्वजनिक भैसक्दा पनि कुनैपनि प्रतिकृया नजनाई चुप रहनु चिन्ताको बिषय हो । घटना बाहिर आईसकेकोले अव उद्योगले मजदुरको मृृत्यु र घटनाको कारणको बिषय सार्बजनिक गरोस् ।