खोज

सल्यान, १७ फागुन ।

कुकुरको टोकाइबाट सल्यानमा चार जना घाइते भएका छन् । जिल्लाको कपुरकोट गाउँपालिका वडा नम्बर ३ मा कुकुरको टोकाइबाट दुई बालक सहित चार जना घाइते भएका हुन् । बहुला कुकुरले टोकेको भन्दै स्थानीय त्रासमा छन् । कपुरकोट तल्लो बजार निवासी उत्तम खड्काको ६ वर्षीय छोरा सुरज मंगलबार कुकुरको टोकाइबाट गम्भीर घाइते भएपछि उपचारका लागि काठमाडौँ लगिएको छ ।

स्थानीय रुद्रवीर कवरका अनुसार सोमबार र मंगलबार गरेर कपुरकोटमा कुकुरले २२ वर्षीया दिपा भण्डारी, दुई बालक र एक पुरुषलाई टोकेको थियो । कुकुरले एक किसानको बाख्रालाई समेत टोकेको थियो । प्रहरी चौकी कपुरकोटका अनुसार कुकुरले मानिसलाई टोकेको सुन्नमा आएको र यसबारे विवरण संकलनको कार्य भइरहेको छ ।

कुकुरले चार जना मानिसलाई टोकिसक्दा र त्रास फैलँदा समेत गाउँपालिकाले कुनै चासो नदिएको स्थानीयले गुनासो गरेका छन् । छोरालाई उपचारका लागि काठमाडौ पुगेका उत्तमले भने, ‘कुकुरले टोकेर मानिसलाई घाइते बनाइसक्यो । तर गाउँपालिकाले कुनै पनि चासो दिएको छैन ।’ सडकका कुकुरको समयमै व्यवस्थापन र नियन्त्रण हुन नसक्ने हो भने रेविज फैलन सक्ने स्थानीयको चिन्ता छ ।

भुस्याहा कुकुरको व्यवस्थापन र रेविज नियन्त्रणका लागि कपुरकोट गाउँपालिकासंग कुनै योजना भएको देखिदैन । कुकुरलाई रेविज विरुद्धको खोप दिने र भुस्याहा कुकुर व्यवस्थापनका लागि चालु आर्थिक वर्षमा कुनै पनि बजेट तथा योजना नरहेको गाउँपालिकाका योजना शाखा प्रमुख खगेन्द्र बहादुर शाहीले जानकारी दिए । कुकुरले मानिसलाई टोकेको र रेविजको त्रास फैलिएकोबारे थाहा भएपनि यसतर्फ गाउँपालिकाका जनप्रतिनिधिहरुले कुनै चासो नदिएको स्थानीयहरु बताउँछन् ।

शारदामा कुकुरको संख्या घटाउने अभियान

यता जिल्लाको शारदा नगरपालिकाले भने २०५ कुकुरको बन्ध्याकरण गरेको छ । नगरपालिकाको पशु सेवा शाखाको आयोजना तथा हार्ट नेपालको प्राबिधिक सहयोगमा नगरपालिका भित्रका कुकुरको बन्ध्याकरण गरिएको हो । नगर प्रमुख प्रकाश भण्डारीले रेबिजको रोकथाम तथा कुकुरको संख्या वृद्धि हुन नदिन वन्ध्याकरण शिविरले महत्वपूर्ण योगदान पुर्याएको बताए । रेविजबाट बच्न र भुस्याहा कुकुरको व्यवस्थापन गर्ने उद्देश्यले बन्ध्याकरण मार्फत कुकुरको नियन्त्रण गर्ने अभियान थालेको नगरपालिकाले जनाएको छ । कुकुरहरुले मानिसलाई झम्टिने, रातिको समयमा यात्रा गर्न पनि असहज पारिदिने र दुर्घटनाको जोखिम समेत बढेकाले स्थायी बन्ध्याकरण गरिएको पशु स्वास्थ्य शाखाले जनाएको छ ।