खोज

सल्यान, १५ फागुन ।

सल्यानको कपुरकोट गाउँपालिका वडा नम्बर ३ कटौजेरीका देव बहादुर खड्का बैदेशिक रोजगारीका लागि दुबैमा थिए । एक छोरा, एक छोरी, श्रीमती तथा परिवारको खुसीका लागि केही पैसा कमाउनका लागि विदेशी भूमिमा पसिना बगाइरहेका थिए । तर घरमा छोराछोरी सहित श्रीमती लालसरी हराएपछि उनी चिन्तामा परे । हाल नेपाल फर्किसकेका देव बहादुरले करिव दुई वर्षदेखि सम्पर्क विहिन रहेका श्रीमती र आफ्ना दुई सन्तानको खोजीका लागि अनुनय गरिरहेका छन् । आफ्ना ससुरा सहित उनी श्रीमतीको खोजीमा लागेका छन् ।

विदेशमा रहदा उनले श्रीमतीको अन्य कुनै पुरुषसंँग अंगालोमा बाँधिएको र केही आपत्तिजनक फोटोहरु इमो मार्फत फेला पारेका थिए । उनी भन्छन्, “त्यस्ता फोटा देखेपछि मं धेरै रोएँ । श्रीमतीलाई फोन गरेर गाली पनि गरेँ । त्यसपछि उ छोराछोरी सहित भागेर कता गई थाहा भएन । घरबाट हराएको दुईतीन महिनापछि मात्रै मैले थाहा पाएँ ।“

अहिले छोरो ७ वर्ष र छोरी ५ वर्षको भइसकेका छन् । उनीहरुको निकै चिन्ता लाग्ने गरेको देव वहादुर बताउँछन् । “अरु नै पुरुषसंग लप्पन छप्पन भएको आशंका छ । उ संगै गएको होकी जस्तो लाग्छ”, आफ्नो श्रीमतीसंग पुरुषको फोटो देखाउँदै उनले भने, “त्यो मान्छेलाई मैले चाही चिन्दैन ।”

माइती पक्षले पनि अहिले सम्म छोरीको अवस्था पत्ता नलागेको बताएको छ । देव वहादुरका ससुरा कपुरकोट २ निवासी लिल बहादुर घर्तीले छोरी र नाती नातीना घर छाडेर हिडेका थाहा भएपछि प्रहरीमा निवेदन दिएको बताए । तर पनि अझै फेला पार्न नसकिएको उनको भनाई छ । करिव एक बर्ष अघि सम्म आफ्नो दिदी वहिनिसंग फोन सम्पर्क गरेको भएपनि हाल दिलसरी र दुई सन्तानको अवस्था आज्ञात रहेको छ ।

आफू विदेशमा रहका कमाएर घर पठाएको रकम समेत हिनामिना भएको दिलसरिका श्रीमान देव बहादुर बताउंँछन् । रहरलाग्दा कलिला छोराछोरीले के गरिरहेका होलान, कहाँ होलान् भन्ने चिन्ताले सताइरहेको भन्दै उनले खोजी कार्यमा सहयोग गरिदिन सबैसंग आग्रह गरेका छन् ।