© २०२३
बुटवल, १५ फागुन ।
कुनै बेला शिवरात्रीमा कालिकानगर बाङ्गेकुसुममा ठूलो मेला लाग्थ्यो । पाँच दिनसम्म चल्ने मेला भर्न रुपन्देहीसहित छिमेकी देश भारतबाट समेत भक्तजनहरु यहाँ आउने गर्दथे । स्थानीय समाजसेवी चन्द्रप्रकाश जैसी पौडेललाई स्मरण छ । मन्दिरप्रतिको धार्मिक आस्थाको कारण दर्शालुहरु भिड लाग्ने गरेको उनी बताउँछन् । ‘स्थानीय सामाजिक ब्यक्ति बुद्धिबहादुर थकालीको खेतमा जमिन जोत्दा ढुगा भेटियो’–उनले भने । सो पथ्थर निकाल्न कोशिस गर्दा सकेनन् । राति सपनामा थकालीलाई सो पथ्थर स्वयंउत्पत्तिमान ज्योर्तिलिङ्ग भएको सन्देश पाए ।
उनले सो स्थानमा मन्दिर स्थापना गरे । दैनिक पुजापाठ लगाए । दुईचार घर हुँदै सो स्थानमा घरधुरीहरु मिलेर सानो मन्दिर निर्माण गरे । थकालीले १ कठ्ठा जग्गा मन्दिरलाई दान गरे । स्थानीय दिपक कार्की आफुहरु साथीभाई मिलेर वर्षेनी मन्दिरको सौन्दर्यीकरण गरेको क्षण हिजोजस्तो सम्झन्छन् । ‘थोरैथोरै सहयोग उठाएर टोल मिलेबाट शिवरात्रीको बेला मन्दिर सिगार्ने गर्थौ’–उनले भने । मन्दिरको छाना छाउने, गेरुवाको रंगरोगन गर्ने, तार लगाउने जस्ता पुजा र मेला लगाउने गरेको उनी बताउँछन् ।
‘धेरै रमाईलो हुन्थ्यो’–उनले भने । बाटोभरि ब्यापारीहरु मिठाई र खेलौनाका पसलहरु थाप्ने गर्दथे । पाँच दिनको मेला भर्नेको भिड हुन्थ्यो । बिस्तारै शहरीकरणसंगै खेतियोग्य जमिन नासिदै गयो । मन्दिर वरपर घरहरु निर्माण भए । संगै ओझेलमा पर्यो मन्दिर । मन्दिरलाई पूर्वाधार निर्माण गरी सुन्दर र आकर्षक बनाईए पनि पहिलेजस्तो चहलपहल भने हुदैन । वडा नं ११ का वडाअध्यक्ष रामचन्द्र क्षेत्री आफु युवा अवस्थामा मन्दिरको सचिवका रुपमा भुमिका खेलेको स्मरण गर्दछन् । धार्मिक सास्कृतिक महत्व बोकेको सो स्थानको विकास गर्न अब युवा पिढी अगाडि आउनुपर्ने उनको सझाव छ । वि.सं २०५७ सालमा नया ढंगबाट ब्यवस्थापन अघि बढाएर अहिलेको अवस्थामा आएको उनले स्मरण गर्दै गुरुयोजना बनाएर अघि बढ्नुपर्ने बताए ।
मन्दिर ब्यवस्थापन गर्न अक्षयकोष
शिवालय मन्दिर ब्यवस्थापनका लागि अक्षयकोष स्थापना गरिएको छ । समाजसेवी मोतिलाल जैसी, डम्वर तिवारी, रुद्र भण्डारी, चन्द्रप्रकाश जैसी पौडेल, अजित श्रेष्ठले मन्दिर संचालनका लागि अक्षयकोष स्थापना गर्न प्रत्येकले ५१ हजार रुपैया सहयोग गर्ने घोषणा गरेका छन् ।