खोज

दाङ, ३ फागुन ।

सञ्चार तथा सूचना प्रविधि मन्त्री एवम् प्रवक्ता रेखा शर्माले स्वदेशी उत्पादन बढ्दै गएपनि यसको पूर्ण बजारीकरण अझै हुन नसकेको बताएकी छन् । घरेलु तथा साना उद्योग महासंघ दाङको आयोजनामा बुधबारबाट दाङको घोराहीमा सुरु भएको लुम्बिनी प्रदेश स्तरीय साना तथा घरेलु उद्योग, पर्यटन तथा कृषि प्रदर्शनीको उदघाटन गदै उनले यस्तो धारणा राखेकी हुन् । उनले स्थानीय कृषि उत्पादन बढ्दै गएपनि बजारीकरणको व्यवस्थापन हुन नसक्दा साना उद्यमीहरु मारमा पर्ने गरेको बताइन् ।

नेपालको हावापानी, माटो, भूगोल फरक फरक भएको हुँदा स्थानीय परिवेश अनुसारको विशेषतायुक्त बस्तुको उत्पादनलाई अब ब्रान्डिङ गर्ने काममा लाग्नुपर्ने उनले बताइन् । “हामीसँग हिमाल छ, पहाड छ, तराई छ, त्यहाँको भूगोल अनुसार हरेक कुराको उत्पादनमा विशेषता छ”, उनले भनिन्, ‘यसको महत्वलाई बिक्री गर्ने काममा हामी चुकिरहेका छौँ, यस प्रकारका प्रदर्शनीले स्थानीय स्तरमा उत्पादित वस्तुका लागि अवसरका रुपमा ल्याउन सक्नुपर्छ ।”

“घरेलु तथा साना उद्यमीहरुले पछिल्लो समय उद्यमशीलताको विकास गर्दै अनुकरणीय काम गर्दै आएका छन्, यो समृद्धिको आधार हो”, उनले भनिन्, “अब यसलाई व्यवस्थित रुपमा अघि बढाउन जरुरी छ । साना उद्यमीहरु प्रोत्साहन गर्ने गरी यस प्रकारका प्रदर्शनी उपयोगी हुनेछ भन्ने विश्वास छ ।”

उनले दाङ कृषि क्षेत्रका लागि उर्वरभूमि भएपनि पुराना रैथाने बस्तु र कृषि उत्पादन लोप हुँदै गएको प्रति चिन्ता व्यक्त गरिन् । हिजोका दिनमा प्रयोगमा रहेका सामग्री तथा कृषि उत्पादनको साटो आधुनिक कृषि प्रणालीले बिस्थापित गर्दै लगेको हुँदा दाङको विशेषता बोकेका कुरालाई प्रदर्शनीले उजागर गर्न सक्नुपर्नेमा जोड दिइन् ।

“दाङको भूमी उर्बर छ यहाँ तोरी, तिलकी चामल, अनदी धान तथा अरु स्थानीय खाद्यान्नका लागि कहलिएको जिल्ला भएको हुँदा पछिल्लो समय यी कुराको उत्पादनमा ह्रास भईरहेको छ”, उनले भनिन् “पहिचान दिने वस्तुको महत्व बुझौँ र यस प्रकारका प्रदर्शनीका माध्यमबाट उजागर गर्ने तर्फ ध्यान देऔँ ।”

स्वदेशमा उत्पादन वढ्दै गएमा देशको समृद्धि तथा रोजगारी सृजना गर्न समेत सहयोग पुग्ने हुँदा दाङ कृषिको लागि धेरै संभावना बोकेको जिल्लाको सही सदुपयोग गरेर अगाडि वढनु पर्ने उनले बताइन् ।

कार्यक्रममा प्रदेश सभा सदस्य राजु खनालले कृषि उत्पादनलाई प्राथमिकता दिएर प्रदर्शनीले बजारीकणमा सहयोग गर्ने विश्वास व्यक्त गरे । आर्थिक समृद्धिका लागि स्थानीय उत्पादन आवश्यक रहेको हुँदा ती उत्पादनलाई अब बजारसँग जोड्ने अभियानका कार्यक्रमलाई प्रदेश सरकारले महत्वका साथ उठाउने बताए । स्थानीय कच्चा पदार्थको सदुपयोग गरेर उत्पादनलाई प्राथमिकता दिन सकेमा उत्पादित वस्तुको आफ्नै महत्व हुने उनको भनाई थियो ।

नेपाल पत्रकार महासंघका केन्द्रीय अध्यक्ष विपुल पोख्रलले कृषि प्रदर्शनीले स्थानीय उत्पादनहरुलाई चिनाउन र बजारीकरणमा भूमिका खेल्ने बताए । साना तथा घरेलु उत्पादनका साथै कृषि क्षेत्रमा भएका नमूना योग्य कामलाई चिनाउन प्रदर्शनीले सफलता पाउने उनको विश्वास थियो । नेपाल घरेलु तथा साना उद्योग महासंघका केन्द्रीय उपाध्यक्ष नेत्र पाठकले दाङ शाखाले आयोजना गरेको प्रदर्शनीले स्थानीय उत्पादनलाई अरु ठाउँमा पनि परिचित गराउने बताए । स्थानीय उत्पादनले पाउने भएकाले आर्थिक पक्ष बलियो हुने उनले बताए ।

उदघाटन समारोहमा प्रेस काउन्सिल नेपालका सदस्य शरद अधिकारीले प्रदर्शनीलाई नाममा जस्तै काममा पनि स्थानीयकरण गरेर यसको महत्वलाई सबै ठाउँमा पुर्याउन तर्फ ध्यान दिन आग्रह गरे ।

नेपाल घरेलु तथा साना उद्योग महासंघ दाङका अध्यक्ष एवम् आयोजक मूल समितिका संयोजक प्रदीप मजगैयाँको अध्यक्षतामा भएको प्रदर्शनीमा सय बढी कृषि तथा घरेलु उद्योगबाट उत्पादित वस्तुहरुको स्टल रहेका छन् । प्रदर्शनीमा लुम्बिनी प्रदेशका १२ जिल्लाको लघु तथा घरेलु उद्योगबाट उत्पादित सामग्री, कृषि सामग्री, हस्तकला सामग्रीहरुको लागि निःशुल्क रुपमा स्टलहरु उपलब्ध गराईएको आयोजकले जनाएको छ । सम्बन्धित जिल्लाको नेपाल घरेलु तथा साना उद्योग महासंघको सिफारिसमा निशुल्क रुपमा स्टलहरु उपलब्ध गराईएको हो ।

आगामी फागुन १३ गतेसम्म हुने प्रदर्शनीमा स्थानीय एवम् राष्ट्रिय स्तरमा लघु तथा घरेलु उद्योगहरुले उत्पादन गरेका वस्तुहरुको पहिचान गराई कृषि तथा उद्योगहरुमा प्रयोग हुने आधुनिक प्रविधीहरुको जानकारीसहित आन्तरिक एवम् बाह्य प्रवद्र्धनमा टेवा पुर्याउनेलगायत उद्देश्यका साथ प्रदर्शनीको आयोजना गरिएको आयोजकले बताएको छ ।