खोज

बुटवल, १ फागुन ।

मानव बेचबिखनको अभियोगमा बुटवलका एक होटल सञ्चालकसहित दुईजना पक्राउ परेका छन् ।

पक्राउ पर्नेमा रुपन्देहीको तिलोत्तमा हेटल हेभन सञ्चालन गरिरहेका तुलसीराम पराजुली र पुजा बिक रहेका छन् । दुई वर्षदेखि फरार रहेका पराजुली बुटवलमा नयाँ डिएसपी आउनासाथ पक्राउ परेका हुन् ।

२०७६ सालमा बुटवलको राजमार्ग चौराहामा वेल्कम रेष्टुरेन्ट सञ्चालन गरेका पराजुलीले कामदारको रुपमा पुजा बिकलाई राखेका थिए । त्यसपछि अन्य युवतीलाई पनि होटलमा कामदारको रुपमा ल्याएर बिना पैसा काममा लगाउने, कम सेवा सुविधा दिने र अन्य शंकास्पद गतिविधि देखाउन थालेपछि युवतीहरुले पूजा बिरुद्ध इलाका प्रहरी कार्यालय बुटवलमा उजुरी हाले ।

त्यसपछि पुजाले उक्त होटल आफूले सञ्चालन गरेको नभै तुलसीराम पराजुलीको भएको प्रहरीसामु बताएपछि प्रहरीले पराजुलीको खोजीकार्य अगाडि बढाएको थियो । तर त्यसपछि पराजुली फरार रहे भने पूजालाई पनि प्रहरीले त्यत्तिकै छाड्यो । प्रहरीले त्यसयता उनीहरुविरुद्धको उजुरीको फाइल त्यत्तिकै थन्काएको थियो ।

बुटवलमा हालैमात्र सरुवा भइ आएका प्रहरी नायब उपरीक्षक दानबहादुर थापाले पराजुलीविरुद्ध परेको मानव बेचबिखनविरद्धको उजुरीको फाइल अनुसनधानका लागि अगाडि बढाएपछि पराजुली पक्राउ परेका हुन् ।

प्रहरी नायब उपरीक्षक थापाले अहिले पराजुली र पूजा दुवैजना प्रहरी नियन्त्रणमा रहेको जानकारी दिए । “सरकारी वकिलको कार्यालयमा फाइल पेश गरिसकिएको छ, अव मुद्दा प्रक्रिया अगाडि बढ्छ”–उनले न्यूज बुटवल टुडेसँग भने । पराजुलीले लगानी गरेको वेल्कम रेष्टुरेन्ट भने हाल बन्द अवस्थामा रहेको छ ।