खोज

बुटवल, २८ माघ ।

सुन्दरनगर खानेपानी उपभोक्ता तथा सरसफाई संस्थाको ११ औ वार्षिक साधारण सभा तथा चौथो अधिवेशनको लुम्बिनी प्रदेश सभा सदस्य भोजप्रसाद श्रेष्ठले उदघाटन गरेका छन् । त्यस अवसरमा बोल्दै उनले समाजमा आउने सबैजसो समस्याहरु समुदाय मिलेर समाधान गर्नुपर्ने सुझाव दिए । “विकासका लागि सकारात्मक सोच जरुरी छ”– उनले भने ।

सुकुम्बासी, कोरिडोरको समस्या, आर्थिक राजधानी निर्माण गर्ने जस्ता धेरै चुनौतीहरु रहेको भन्दै यसको लागि तीन तहकै सरकार लाग्ने उनले बताए । शिक्षा, स्वास्थ्य, सरसफाई, रोजगारको क्षेत्रमा सरकारको ध्यान जरुरी रहेको उनले बताए । करीब २ लाख २५ हजार घनमिटरको पानीटंकी निर्माण र खानेपानी वितरणको नमूना काम भएको उनले बताए । देशको राजनीतिक निर्माण प्रक्रिया गलत भएको दुःखेसो गर्दै उनले निर्वाचन प्रक्रियामा परिवर्तन जरुरी रहेको बताए । खर्चिलो निर्वाचनकै कारण भष्ट्राचार बढेको उनले दाबी गरे ।

कार्यक्रममा संस्थाको परिचय बोकेको स्मारिका समेत प्रकाशन गरिएको छ । यसैगरी टोलका जेष्ठ नागरिक खेम बहादुर टोमाटो, नारायणी बिकलाई दोसल्लाबाट सम्मान गरिएको थियो । यसैगरी तिलोत्तमा माबिमा कक्षा ८ मा अध्ययरत बिनोद दमाई र उजिरसिह माबि कक्षा ४ का अध्ययरत विकास बिकलाई छात्रवृत्ति प्रदान गरिएको छ ।

कार्यक्रममा संस्थाका अध्यक्ष विरमान लामाले समुदायमा शुद्ध खानेपानी पुर्याउने अभियानमा आफुहरु सफल भएको बताए । उपभोक्ताहरुलाई साप्ताहिक सरसफाई र सचेतनामा सहभागी गराई कार्यक्रम गर्दै आएको, ओभरहेड टंकी निर्माणमा पहल गरेको उनले बताए । बुटवल उपमहानगरपालिकाका नगरप्रमुख खेलराज पाण्डेले दुई मोडलमा खानेपानी वितरण भैरहेको बताए । समिति मार्फत खानेपानी र सरसफाईमा २४ वटा संस्थामार्फत जनताको सहभागिता र अर्कोतर्फ खानेपानी संस्थामार्फत वितरण भैरहेको उनले बताए । नगरको खानेपानीलाई ब्यवस्थापन गर्न जलश्रोत सम्बन्धी ऐन पालिकाले तयार गरेको उनले बताए ।

हिलपार्कमा ५ लाख लिटरको ट्यांकी निर्माणको काम जारी रहेको उनले बताए । चिडियाखोला खानेपानी ट्रिटमेन्ट प्लान्ट परियोजनाको काम जग्गा अभावको कारण रोकिएको, झुम्सा खानेपानी आयोजना समेत धेरै काम सकिएको उनले बताए । बुटवलको धेरै समस्या समाधान हुने गरी काम अघि बढेको उनले बताए । खानेपानी जडान र वितरणमा न्यून शुल्क बनाउने प्रतिस्पर्धा अबको आवश्यकता भएको उनले बताए । पिउने पानीसंगै टोल समाजको सौन्दर्यीकरणको अभियानसंगै लैजानुपर्ने उनले बताए । नगरका सबै किसिमका समस्या समधानको विषयमा प्रदेश र संघीय सरकारसंग समन्वय गरेर अघि बढ्ने बताए ।

कार्यक्रममा बुटवल उपमहानगरपालिकाका उपप्रमुख सावित्रा अर्याल, वडा नं ६ का वडाअध्यक्ष लोकनाथ न्यौपाने, बुटवल उद्योग वाणिज्य संघका महासचिव विमल भट्टराई, गौतम बुद्घ हस्पिटलका एजाज आलम, वडा न. ६ वडा सदस्य चीन बहादुर श्रेष्ठ, वडा नं. ६ का निवर्तमान अध्यक्ष जगदिशचन्द्र आचार्य, निर्वाचन समितिका संयोजक बलराम न्यौपाने, सुन्दरशान्ति टोल विकास संस्थाका अध्यक्ष पूर्ण बहादुर बिक, युनाईटेड मिसन टु नेपालका चेली गुरुङ, संस्थाका सहसचिव ध्रुवराज खनालले सुन्दर नगरमा खानेपानी र सरसफाईको विकाससंगै अमूल्य पिउने पानीको महत्वलाई बुझाउने गरी कार्यक्रमहरु बनाउन सुझाव दिए । संस्थामा ५ सय ९७ घरधुरीमा धारा जडान भएको छ । यसैगरी ४ स्थानमा सार्वजनिक धारा जडान गरी सेवा दिईएको छ ।