खोज

तिलोत्तमा, २७ माघ ।

लुम्बिनी सूचना तथा सञ्चार सहकारी संस्था लिमिटेडद्वारा संचालित रेडियो लुम्बिनीले शुक्रबार आफ्नो २४ औं स्थापना दिवस मनाएको छ । रेडियो लुम्बिनीले वि.सं. २०५६ साल माघ २७ गते वसन्त पञ्चमी अर्थात माघ २७ गतेका दिन उपत्यका बाहिर पहिलो पटक आफ्नो आवाज तरंगित गरेको थियो । दक्षिण एसियामै सहकारी सस्थाद्वारा सन्चालित पहिलो सामुदायिक रेडियोको रुपमा रेडियो लुम्बिनीले आफ्नो प्रसारण सेवा सुरु गरेको थियो ।
सामाजिक रुपान्तरणमा निरन्तर क्रियाशिल रहेको रेडियो लुम्बिनीले शान्ति, समृद्धि र सामाजिक रुपान्तरंणलाई मूलमन्त्र बनाएर आवाज बिहिनहरुको आवाज बुलन्द गर्दै आएको छ । रेडियोले सूचना, सन्देश र मनोरञ्जन मार्फत विभिन्न भाषभाषी, क्षेत्र–वर्ग एवं समुदायमा पछाडि पारिएकालाई अगाडि ल्याउने तथा लुकेर रहेका प्रतिभाहरुको आवाज बुलन्द गर्दै आएको छ । यसैगरी समाजमा देखिएका बिकृति र विसंगति बिरुद्ध रेडियो लुम्बिनीले आफ्ना विभिन कार्यक्रम र समाचार मार्फत पैरवी समेत गर्दै आएको छ । रेडियोले सुशासन र पारदर्शीताका लागि आवाज उठाउँदै आम नागरिकको चासो र जनजिविकाको बिषयबस्तुलाई समेत सम्बोधन गर्दै आएको छ ।

लुम्बिनी सूचना तथा सञ्चार सहकारी संस्था लिमिटेडले हाल आएर टेलिभिजन समेत संचालन गरेर सूचनाको पहँुच बढाउने कोशिस गरेको छ । स्थापना दिवसका अवसरमा शुभकामना दिदै संस्थाका अध्यक्ष दुर्गा प्रसाद पाण्डेयले, रेडियोसंगै तिलोत्तमा टेलिभिजन समेत संचालन गरेर सस्थाले सूचना, सन्देश र मनोरञ्जनका माध्यमबाट आफुलाई थप परिमार्जित गर्ने अभियानमा लागि परेकोे बताएका छन् । लुम्बिनी सूचना तथा सञ्चार सहकारी संस्था लिमिटेड रेडियो लुम्बिनीको २४ औं स्थापना दिवसको अवसरमा शुभकामना दिंदै अध्यक्ष पाण्डेयले अब श्रब्यबाट संस्था दृश्यतपÞर्m लम्किएको प्रतिक्रिया दिए । यसैगरी रेडियो लुम्बिनीका संस्थापक अध्यक्ष, पूर्वअध्यक्ष, सञ्चालक समिति सदस्य लगायत रेडियोसंग नजिक रहेर रेडियोलाइ माया गर्ने आमसमुदायले समेत रेडियो लुम्बिनी एवं तिलोत्तमा टेलिभिजनलाई शुभकामना दिएका छन् ।

यसैबीच शुक्रबारै रेडियोको आफ्नै सभाहलमा रेडियो लुम्बिनी एवं तिलोत्तमा टेलिभिजनको २४ औ बार्षिकोत्सव कार्यक्रम सम्पन्न भएको छ । अग्रज एवं रेडियो लुम्बिनीका सल्लाहकार, सस्थापक–अध्यक्ष, पूर्व–अध्यक्ष, संचालक समिति सदस्य लगायतको उपस्थितिमा खुल्ला छलफल गरेर बार्सिकोत्सव कार्यक्रम मनाइएको हो । संस्थाका अध्यक्ष दुर्गा प्रसाद पाण्डेयको अध्यक्षता एवं सस्थापक–अध्यक्ष तथा संस्थाका प्रेस सल्लाहकार अर्जुन ज्ञवालीको प्रमुख आतिथ्यमा सम्पन्न कार्यक्रममा बोल्ने वक्ताहरुले, रेडियो तथा टेलिभिजन स्थापनाका क्रममा भएका दुःख–सुख एवं कठिनाई, अवसर र चुनौती तथा भावी योजनाका बिषयमा आ–आफ्नो अनुभब साटासाट गरेका थिए ।

कार्यक्रममा सस्थाका पूर्व अध्यक्ष एवं बित्तिय सल्लाहकार कृष्ण प्रसाद अर्याल, पूर्व अध्यक्ष एवं कानुनी सल्लाहकार लक्ष्मण ज्ञवाली, निवर्तमान अध्यक्ष एवं इन्जिनियर दुजेन्द्र बस्नेत, संस्थाका उपाध्यक्ष अर्जुनराज उपाध्याय, कोषाध्यक्ष बिष्णु प्रसाद पाण्डे, संचालक समिति सदस्यहरु देवी वाग्ले, इन्द्र बहादुर सुनार, राम बहादुर बस्नेत, राम प्रसाद ढकाल, शारदा अर्जेल, श्याम बश्याल, उमेश चन्द्र आचार्य, यसैगरी लेखा समिति सदस्यहरु लेखनाथ पाण्डे, तुलसीराम कंडेल, रेडियो एवं टेलिभिजनका कर्मचारी र प्राविधिक लगायतको उपस्थिति रहेको थियो । कार्यक्रममा रेडियो लुम्बिनी एवं तिलोत्तमा टेलिभिजनका उपाध्यक्ष अर्जुनराज उपाध्याय, स्टेशन म्यानेजर मिनाक्षी न्यौपानेलगायतले पनि बोलेका थिए ।