खोज

काठमाडौँ ।

देशको सूचना तथा प्रविधि क्षेत्रमा आवश्यक कानुन बन्न नसकेको भन्दै सञ्चार, सूचना तथा प्रविधि मन्त्री रेखा शर्माले आईटी कानुन चाँडै नै तयार गरिने बताएकी छन् । २८ औं क्यान इन्फोटेक २०२३ को उद्‍घाटन समारोहमा बोल्दै मन्त्री शर्माले आईटी कानुन बन्न नसकेकोमा खेद प्रकट गर्दै उनको नेतृत्वमा यो कामलाई चाँडै नै टुङ्गो लगाउने बताएकी हुन् ।

“सूचना तथा प्रविधि क्षेत्रका लागि छुट्टै कानुनको आवश्यकता भएपनि यसमा प्रभावकारी काम हुनसकेको छैन । यो क्षेत्रलाई नियमन तथा प्रभावकारी बनाउनको लागि आईटी कानुन छिट्टै नै तयार गरेर संसदबाट पारित गराउने प्रतिबद्धता जाहेर गर्छु,” उनले भनिन् ।

साथै आईटी कानुनका लागि सरोकारवालाहरूको सुझाव पनि महत्त्वपूर्ण हुने भन्दै उनले यस क्षेत्रमा काम गरिरहेका व्यक्ति तथा संस्थाहरूलाई सुझावको लागि पनि आग्रह गरेकी छन् । योसँगै सरकारको लगानीमा एउटा आईटी कम्पनी स्थापना गर्ने विषयमा पनि आवश्यक छलफल गरेर अगाडि बढ्ने उनले बताइन् ।

“आईटी क्षेत्रको सानो सानो कुरामा ध्यान नदिँदा अर्बौँ रकम बाहिरिन सक्छ । यस क्षेत्रलाई प्राथमिकतामा राख्न नसक्दा देशको राजश्व गुमिरहेको छ,” उनले भनिन्, “योजनाबद्ध रुपमा राज्य जान नसक्दा हाम्रो प्राविधिक जनशक्ति विदेश गइरहेका छन् । नेपाल सरकारको लगानीमा आईटी कम्पनी खोल्ने विषयमा सरकार सकारात्मक छ । यस विषयमा छलफल गरेर अगाडि बढ्नेछौँ।”

२८ औ‌ं क्यान इन्फोटेक २०२३ मंगलबारबाट सुरु भएको छ । कम्प्युटर एसोसिएन नेपाल महासंघ (क्यान महासंघ) ले आयोजना गरेको यो कार्यक्रम आइतबारसम्म सञ्चालन हुनेछ । यो प्रर्दशनी सूचना प्रविधिसम्बन्धी चासो राख्नेहरुको लागि यस क्षेत्रमा भएका विकास तथा प्रयोगका बारेमा जानकारी लिने विशेष थलो पनि हुने विश्वास आयोजकले लिएको छ ।

क्यान इन्फोटेकमा ब्राण्डिङ, आईसीटी एक्ससरिज, प्रडक्ट लञ्चिङसँगै आईटी करियर काउन्सिलिङ (स्टुडेन्ट पेभिलियन), कलेज पेभिलियन, स्टार्टअप पेभिलियन, सफ्टवेयर पेभिलियनको व्यवस्था गरिएको छ । यसपटक नेपाली इनोभेसन, प्रतिभा र स्टार्टअपलाई विशेष प्रवर्द्धन गरिएको छ ।

साथै क्यान इन्फोटेककै दौरान हरेक दिन नेपाल पर्यटन बोर्डको सभाहलमा आर्टिफिसियल इन्टेलिजेन्स, बिग डेटा, मसिन लर्निङ, क्लाउड कम्प्युटिङ तथा अन्य पछिल्ला टेक्नोलोजी ट्रेन्डका विषयमा कन्फ्रेन्स पनि सञ्चालन हुनेछ ।

क्यान इन्फोटेकको अवलोकनका लागि सर्वसाधारणलाई रु. १०० र विद्यार्थीलाई रु. ५० शुल्क निर्धारण गरिएको छ । इन्फोटेकको टिकेटिङ पार्टनर पेवेलको मोबाइल एप डाउनलोड गरी एपबाटै रु. २५ मा अनलाइन टिकट खरिद गर्न सकिने व्यवस्था ल्याइएको छ ।

यस संस्करणको इन्फोटेक मेलालाई करिब साढे ३ लाखले अवलोकन गर्ने अपेक्षा लिइएको छ ।