सामग्री खोज्नुहोस्

काठमाडौँ ।

सांसदहरूले त्रिपुरेश्वर चोकमा दुई महिनाको अन्तरालमा दुई जना चालकले आत्मदाह गरेको विषयमा सरकारको ध्यानाकर्षण गराएका छन् ।

प्रतिनिधिसभाको आजको बैठकमा आज आकस्मिक समयमा भाग लिने सांसदहरूले पटक–पटक सवारीचालक र ट्राफिक प्रहरीबीचको विवादको कारणले चालकहरू आत्मदाहको अवस्थामा पुग्नुको कारण खोज्नुपर्ने बताएका छन् ।

सांसद युवराज दुलालले काठमाडौँको त्रिपुरेश्वरचोकमा सवारीचालक र ट्राफिक प्रहरीबीचको विवादको कारणले सोमबार सवारीचालक अर्जुन दोङले मृत्युवरण गर्ने अवस्था आउनु ज्यादै दुखदः रहेको र उनले मृत्युवरण गर्नुको कारण सरकारले गम्भीर भएर खोजी गर्नुपर्ने बताए ।

“त्रिपुरेश्वर चोकमा उही ठाउँ र उही प्रकृतिको घटना दुई महिनाको अन्तरालमा दोर्‍योरिएकाले पनि ट्राफिक प्रहरीसँगको विवाद हुँदा चालकले आत्मदाह जस्तो गम्भीर प्रकृतिको घटना किन रोज्नुपरेको छ । त्यस्ता घटना रोक्न किन सरकारी निकायले पर्याप्त सावधानी अपनाइएन सो विषयमा सरकारको ध्यानाकर्षण गराउँछु”, उनले भने, “यस्ता घटना बारम्बार किन भइरहेका छन् भन्ने विषयमा सरकार गम्भीर हुन जरुरी छ ।”

सांसद क्रान्तिशिखा धितालले त्रिपुरेश्वरचोकमा भएका दुई घटनाले प्रहरीको काग गर्ने शैली र चालकको मनोदशाको विषयमा गम्भीर हुन जरुरी रहेको बताइन । उनले ट्राफिक प्रहरीकोे पनि यात्रु र चालकसँग गर्नुपर्ने व्यवहार र शैली बदल्नुपर्ने बताइन ।

सांसद आशिका तामाङले ट्राफिक प्रहरीले अनिवार्य शरीरमा क्यामेरा जडान गरेर आवश्यक कारबाही अघि बढाउनुपर्ने बताइन ।

सांसद वलावती शर्माले त्रिपुरेश्वर चोकमा २५ वर्षे युवाले बसभित्र आगो लगाएर मृत्युवरण गर्नुपर्ने अवस्था किन आयो भनेर सरकारको गम्भीर ध्यानाकर्षण गराइन ।

सांसद आरेन राई ‘जेनजी’ आन्दोलनपछि हरेक युवामा नैराश्यता छाएको विषयमा सरकारको गम्भीर ध्यानाकर्षण गराए ।

सांसद कुलभक्त शाक्यले त्रिपुरेश्वरचोकमा भएको घटनालाई सामान्य घटनाको रूपमा नहेरी गम्भीर घटनाको रूपमा हेर्नुपर्ने बताउँदै तत्कालै गृहमन्त्रीले जवाफ दिनुपर्ने माग गरे ।

सांसद आशिष गजुरेल सडक प्रयोगकर्ता र चालकको मनोवैज्ञानिक असरका विषयमा विदेशी मुलुकमा ठूलो लगानी हुने गरेता पनि नेपालमा सो नहुँदा पनि विभिन्न खालका समस्या आउने गरेको बताए ।

सांसद रमेशकुमार मल्लले सल्यान जिल्लामा एक महिनाको अवधिमा स्क्रब टाइफसको सङ्क्रमणको कारणले सात जनाको मृत्यु भएकाले पनि सोसँग आवश्यक पर्ने स्वास्थ्य किटहरूको पनि अभाव रहेकाले तत्कालै आपूर्ति गर्न सरकारसँग माग गरे ।

सांसद सोम शर्माले बाग्लुङमा फैलिएको डेङ्गुको समस्याको विषयमा सरकारको ध्यानाकर्षण गराए ।