खोज

बुटवल, २३ माघ ।

बुटवल उपमहानगरपालिका वडा नं. ७ मा एक दिने निःशुल्क स्वास्थ्य शिविर सम्पन्न भएको छ । बुटवल उपमहानगरपालिका वडा नं. ७ वडा कार्यालयको समन्वयमा लियो क्लब अफ बुटवलको सहकार्य तथा लायन्स क्लव अफ बुटवल मणी उजेशको आयोजनामा सो शिविर सम्पन्न भएको हो ।

बुटवल उपमहानगरपालिका वडा नम्बर ७ हिलपार्कमा भएको निःशुल्क स्वास्थ्य शिविरमा पुगेका १७ जना विरामीले एक वर्षका लागि स्वास्थ्य परीक्षणमा छुट पाउने भएका छन् । दिपनगर हिलपार्कमा भएको एक दिने निःशुल्क स्वास्थ्य शिविरमा स्वास्थ्य परीक्षण गराएका ३५० जना मध्येका शिविरमा सहभागी भएका विपन्न तथा गरिव परिवारका सदस्यमध्ये १७ जनाले एक वर्षसम्मको सम्पूर्ण स्वास्थ्य परीक्षणमा शत प्रतिशत छुट पाउने भएका हुन् ।

बुटवल–७ का वडाबासीहरुको मुटु, पिसाव, दाँत, मधुमेह, ब्लड प्रेसर लगायतका रोग सम्वन्धी परीक्षण गरी औषधी वितरण गरिएको लायन्स क्लब अफ बुटवल मणि उजेशका अध्यक्ष डाक्टर शान्ता शर्माले जानकारी दिइन् । आगामी दिनमा समेत नागरिकको जनस्वास्थ्यलाई मध्यनजर गरी थप सहजताका साथ निःशुल्क शिविर सञ्चालन गर्ने उनले बताइन् ।

सोमबार हिलपार्कमा भएको शिविरमा स्वास्थ्य परीक्षण गराएको ओपिडि कार्डका आधारमा १७ जनाले शत प्रतिशत र अन्यले २० प्रतिशत छुट पाउने भएका हन् । शिविरमा वडा नं. ७ का ३५० भन्दा बढीले मुटु, पिसाव, दाँत, मधुमेह, ब्लड प्रेसर लगायतको परीक्षण गराएका थिए । शिविरको उदघाटन गर्दै बुटवल उपमहानगर प्रमुख खेलराज पाण्डेले समय समयमा विभिन्न स्थानमा गरिने निःशुल्क स्वास्थ्य शिविरले सबै वर्गका ब्यक्तिले स्वास्थ्य सेवा पाउने भएकाले आयोजकलाई धन्यवाद दिए । उनले स्वास्थ्यसेवालाई नगरका सबै नागरिकमा पुर्याउने अभियानमा लायन्स क्लवले सहयोग गरेको उल्लेख गर्दै भविष्यमा गरिने स्वास्थ्य सम्वन्धी गतिविधिमा सहकार्य गर्ने बताए । शिविरमा बुटवल ७ का वडाध्यक्ष पदम राज गाहा, लायन्सका फष्ट भिडिजी पुरुषोत्तम प्रधानाङ्ग, लियो क्लव अफ बुटवल मणि उजेशका अध्यक्ष दर्पण घिमिरे लगायतले आआफ्ना भनाई राखेका थिए । निःशुल्क औषधी समेत वितरण गरिएको शिविरमा कार्डियोलोजिष्ट डा. अर्जुन बुढाथोकी, युरोलोजिष्ट डा. प्रेमराज सिग्देल, डेन्टिष्ट डा. शंकर वज्राचार्य लगायतले विरामीको स्वास्थ्य परीक्षण गरेका थिए । शिविरमा औषधी वितरण तथा प्राविधिक सहयोग बुटवलको विजया फार्माले गरेको थियो भने शिविरमा विरामीका लागि एक वर्षसम्मको स्वास्थ्य छुटको ब्यवस्था पनि विजया फार्माले नै गरेको कार्यक्रम संयोजक संजीवना आचार्यले बताइन् ।