सामग्री खोज्नुहोस्

काठमाडौँ । नेपालमा आएको विनाशकारी बाढी तथा पहिरोपछि दुई नदीको संगमस्थलमा ठुलो प्राकृतिक बाँधसहितको ताल बनेको र आगामी तीन दिनमा उक्त ताल फुट्ने जोखिम उच्च रहेको चीनको जलस्रोत मन्त्रालयले जनाएको छ ।

चीनको केन्द्रीय टेलिभिजन (सीसीटीभी) का अनुसार नेपालमा छोछेन खोला र पुरेपु त्साङ्पो नदीको संगम नजिकै ठुलो ‘ब्यारियर लेक’ बनेको छ । बिहीबार बिहानसम्म उक्त तालमा करिब २० लाख घनमिटर पानी जम्मा भइसकेको र तालबाट पानी बाहिरिनसमेत थालेको मन्त्रालयले जनाएको छ ।

मन्त्रालयका अनुसार आगामी तीन दिनमा थप करिब ३० लाख घनमिटर पानी तालमा जम्मा हुने अनुमान गरिएको छ । पानीको मात्रा निरन्तर बढ्दै गएमा प्राकृतिक बाँध भत्किएर अचानक ठुलो बाढी आउन सक्ने भएकाले ताल फुट्ने जोखिम उच्च रहेको चेतावनी दिइएको छ ।

चीनको जलस्रोत मन्त्रालयले तालको अवस्थालाई नजिकबाट निगरानी गरिरहेको जनाएको छ । सम्भावित रूपमा प्राकृतिक बाँध फुटेमा बाढीको बहाव कुन दिशातर्फ र कति तीव्र गतिमा पुग्न सक्छ भन्ने आकलन गर्न बाढीसम्बन्धी विभिन्न ‘सिमुलेसन’ तथा विश्लेषणसमेत भइरहेको मन्त्रालयले जनाएको छ ।

सम्भावित जोखिमलाई ध्यानमा राख्दै आकस्मिक उद्धार तथा राहत कार्यमा सहयोग पुर्‍याउन आवश्यक तयारीसमेत भइरहेको मन्त्रालयले जनाएको छ ।

चीनतर्फ पनि उद्धार तथा राहत तीव्र
नेपाल–चीन सीमा क्षेत्रमा नेपालको भूभागबाट सुरु भएको विनाशकारी पहिरोले चीनको दक्षिण पश्चिमी सिजाङ स्वायत्त क्षेत्रको क्यिरोङ बन्दरगाह आसपासमा ठुलो क्षति पुर्‍याएपछि चिनियाँ अधिकारीहरूले विभिन्न मोर्चाबाट उद्धार तथा राहत कार्य तीव्र बनाएका छन् ।

चिनियाँ जनमुक्ति सेना, आपत्कालीन उद्धारकर्मी, इन्जिनियरिङ टोली, दूरसञ्चार कम्पनी तथा राहत संस्थाहरूले घटनास्थलमा जनशक्ति, विमान, उद्धार उपकरण तथा आवश्यक सामग्री पठाइरहेका छन् ।

दुर्गम तथा कठिन भौगोलिक अवस्था, निरन्तर भइरहेको वर्षा र थप प्राकृतिक विपद्को जोखिमका बिच उद्धार तथा राहत कार्य चुनौतीपूर्ण बनेको चिनियाँ पक्षले जनाएको छ ।