© 2026
२६ श्रावण २०८३, मंगलवार
२६ श्रावण २०८३, मंगलवार
काठमाडौँ । आजदेखि नेपाल मोबिलिटी एक्स्पो–२०२६ काठमाडौँको भृकुटीमण्डपमा सुरु भएको छ ।
नेपाल प्रहरीका महानिरीक्षक दानबहादुर थापाले एक्स्पोको उद्घाटन गर्दै आर्थिक विकासका लागि यातायात र मोबिलिटी क्षेत्रबिच सहकार्य हुनुपर्ने बताए ।
“यस्ता प्रदर्शनीले नेपालको यातायात र मोबिलिटी क्षेत्रको विकासमा कोशेढुङ्गा सावित हुने विश्वास लिएको छु । सडक सुरक्षा, ट्राफिक व्यवस्थापन र सवारी अनुशासनलगायतका पक्षमा ध्यान दिन जरुरी छ,” उनले भने, “नियामक निकाय र सरोकारवालाबिच समन्वय र सहकार्य गरेर अघि बढेको खण्डमा यातायात क्षेत्रलाई व्यवस्थित गराउन सकिन्छ ।”
नेपाल अटोमोबाइल इम्पोर्टर्स एण्ड म्यानुफ्याक्चरर्स एसोसिएसन (नाइमा) का अध्यक्ष रितुसिंह वैद्यले एउटै छानामुनि विभिन्न मोडेलका सवारीसाधन प्रदर्शनीमा राखिएको बताए ।
साउन २६ देखि ३१ गतेसम्म सञ्चालन हुने एक्स्पोमा दुईपाङ्ग्रे सवारीसाधनका १८ र चारपाङ्ग्रे सवारीसाधनका २९ नयाँ ब्रान्ड सार्वजनिक गरिँदै छ ।
नेपाल उद्योग वाणिज्य महासङ्घका अध्यक्ष अञ्जन श्रेष्ठ, नेपाल उद्योग परिसङ्घका अध्यक्ष वीरेन्द्रराज पाण्डे, नेपाल यातायात व्यवसायी राष्ट्रिय महासङ्घका अध्यक्ष पुण्यप्रसाद सिटौला (सरोज) तथा नेपाल चेम्बर अफ कमर्सका अध्यक्ष कमलेश अग्रवाललगायतले यातायात क्षेत्रलाई व्यवस्थित र मर्यादित बनाउनुपर्ने धारणा व्यक्त गरे ।
© 2026
All rights reserved.
Design & Developed By:
