खोज

दाङ, ७ माघ ।

प्रेस चौतारी नेपाल दाङ शाखाले यही माघ २२ गते आफ्नो स्थापना दिवस मनाउने भएको छ । प्रेस चौतारी दाङका अध्यक्ष ईन्द्र डिसीको अध्यक्षतामा शनिबार घोराहीमा बसेको बैठकले यही माघ २२ गते तुलसीपुरमा रक्तदान कार्यक्रमसहित स्थापना दिवस भव्य रुपमा बनाउने निर्णय गरेको छ ।

यसैगरी, प्रेस चौतारी नेपाल दाङ शाखामा स्थापना भएका अक्षयकोष तथा पुरस्कारहरु व्यवस्थापनका लागि उपाध्यक्षद्वय प्रेमबहादुर राम्जा र सुधासुमन ढकाल, कोषाध्यक्ष गोकर्ण पौडेल र सहसचिव एकराज भण्डारीको समिति गठन गरिएको छ ।

यसैगरी, बैठकले लुम्बिनी प्रदेश सरकारको मुख्यमन्त्रीमा नियुक्त भएका नेकपा एमालेका पोलिटव्युरो सदस्य लिला गिरीलाई बधाईसहित पार्टीबाट समानुपातिक प्रतिनिधि सभा सदस्य भएका मेनका पोख्रेल, आश्मा चौधरी र प्रदेश सभा सदस्यहरु सीता चौधरी र रेखा शर्मा बधाई ज्ञापन गर्दै समग्र दाङको हितका लागि काम गर्न नेतृत्वदायी भूमिका लिन पनि अनुरोध गरेको छ ।

एमाले पोलिटव्युरो सदस्य एवम् प्रदेश सरकारका नवनियुक्त मुख्यमन्त्री लिला गिरीलगायत नेकपा एमालेबाट प्रतिनिधित्व गर्ने मन्त्रीहरुलाई सम्मान गर्ने निर्णय गरिएको जिल्ला सचिव किरण गौतमले जानकारी दिए ।

यसैगरी बैठकले त्रिभुवननगर जेसीज वर्ष २०२३ को महासचिवमा संगठनका जिल्ला सचिव किरण गौतम र कोषाध्यक्षमा साधारण सदस्य टंक रावत ‘अनन्त’ निर्वाचित भएकोमा बधाईसहित सफल कार्यकालको शुभकामना व्यक्त गरेको छ ।

बैठकमा संगठन सुदृढीकरणसँगै आगामी कार्ययोजना लगायत विषयमा पनि छलफल भएको थियो । सो अवसरमा, लुम्बिनी प्रदेशको स्थायी राजधानी कार्यान्वनमा आएकाले राप्ती उपत्यका देउखुरीमा प्रेस चौतारी नेपालको भूमिका बढाउने सन्दर्भमा पनि वृहत छलफल भएको छ । यसैगरी, संगठनलाई थप बलियो बनाउन पालिका तहसम्मका संगठनलाई चलायमान बनाउन योजनावद्ध रुपमा कार्यक्रम गर्दै लैजाने तयारी भएको छ ।