खोज

नवलपरासी, ४ माघ ।

गर्भवती तथा सुत्केरी आमा र बच्चाको स्वास्थ्यलाई ध्यान दिदै पश्चिम नवलपरासीको रामग्राम नगरपालिकाले निःशुल्क पौष्टिक आहार वितरण सुरु गरेको छ । बुधवार १८ वटै वडाबाट गर्भवती महिलालाई ५ किलो र सुत्केरीलाई १० किलोका दरले पौष्टिक आहार वितरण सुरु गरिएको नगर प्रमुख धनपती यादवले बताए । रामग्राम १६ मा रहेको सुक्रौली स्वास्थ्य चौकिमा आयोजित एक कार्यक्रमका बीच नगर प्रमुख यादवले १८ वटै वडामा पोषण झोला वितरण कार्यक्रमको शुभारम्भ गरेका थिए । गर्भवती भएको तीन महिना पुरा भई स्वास्थ्य संस्थामा नियमित स्वास्थ्य जाँच गराईरहेका महिला र सुत्केरी भएको ४५ दिन पूरा नभएका आमाहरुलाई पोषिलो खानेकुरा सहितको झोला वितरण गरिएको छ ।

सबै वडामा रहेका आधारभुत स्वास्थ्य सेवा केन्द्र र स्वास्थ्य चौकीबाट पौष्टिक तत्व मिसिएको खिर, दलिया, हलुवा लगायतका खाना सहितको झोला वितरण भईरहेको नगरपालिकाले जनाएको छ । ग्रामीण भेगका धेरै महिलाले गर्भवती भएको बेला र सुत्केरी भएपछि पनि प्रर्याप्त पोषण सहितको खानेकुरा खान नपाउँदा बच्चा र आमाको स्वस्थ्यमा असर पर्ने आएकाले नगरपालिकाले पौष्टिक तत्वले भरिपूर्ण आहार निःशुल्क वितरण गरेको नगर प्रमुख यादवले बताए । जसका लागि नगरपालिकाले २९ लाख रुपैयाँ बजेट विनियोजन गरेको छ । विगतका वर्षमा सीमित जनसङख्यालाई मात्र वितरण गरिदै आएको पोषिलो झोला यसपटक भने व्यापक रुपमा १८ वटै वडाबाट एकैसाथ वितरण सुरु गरेको यादवले बताए । बच्चा स्वस्थ हुनका लागि आमाको पेटबाटै पोषिलो खानेकुरा खानुपर्ने भएकाले नगरपालिकाले भावी पुस्ताको स्वस्थ्यको लागि पनि पोषिलो झोला कार्यक्रमलाई व्यापक बनाएको उनले बताए । पोषणको कार्यक्रम थप प्रभावकारी बनाउन संघीय सरकारसंँग थप २ करोड बजेट माग गरिएको पनि नगर प्रमुख यादवले जानकारी दिए ।

पोषिलो झोला अभियानबाट सदरमुकाम परासी सहित नगरका नौ सय महिला लाभान्वित हुने छन् । खानेकुराको निश्चित मात्रा तोकिएकाले उक्त पोषिलो खानेकुरा सुत्केरी नहँुदा सम्म नियमित खान पुग्ने गरी वितरण गरिएको नगरपालिकाको स्वास्थ्य शाखाका सुरज हरिजनले बताए । पोषिलो झोला वितरण कार्यक्रम यस क्षेत्रमै पहिलो भएको बताउँदै सुक्रौली स्वास्थ्य चौकीका ईन्चार्ज बलराम सापकोटाले यसको सही सदुपयोग गर्न महिलाहरुलाई आग्रह गरे । स्वास्थ्य संस्थामा गर्भवती हुनासाथ नियमित स्वास्थ्य जाँच गराउने नगरपालिकाले उपलब्ध गराएको सेवा लिन सापकोटाले आग्रह गरे ।
बुधबार अन्य वडामा पनि नगर उपप्रमुख सम्झना चौधरी, सम्बन्धित वडाका वडाअध्यक्ष लगायत जनप्रतिनिधिको उपस्थितिमा पोषण झोला वितरण गरिएको छ । रामग्राम नगरपालिका बालमैत्री नगरपालिका घोषणा भईसकेको नगरपालिका हो ।