खोज

बुटवल, ३० पुस ।

जनताको शान्ति सुरक्षामा २४ सै घण्टा खटिईरहने नेपाल प्रहरीका शहर भित्रका कतिपय कार्यालय, प्रहरी बिटमा खानेपानीको धारा शौचालय समेत छैनन् । मुख्यबजार क्षेत्रलाई केन्द्रित गरेर स्थापना गरिएता पनि त्यस्ता प्रहरी कार्यालयहरुमा आधारभुत आवश्यकता समेत व्यवस्था नगरिएको पाइएको हो ।

टालटुले पारामा सञ्चालन भैरहेका यी र यस्ता प्रहरी बिटले सुरक्षाका लागि खटिएका प्रहरीलाई थप सास्ती दिएको छ । सुरक्षाका कारणले महत्वपूर्ण तर कामचलाउका रुपमा रहेका कार्यालयमा खटिने प्रहरीले दुःख पाउने गरेको पाईएको हो ।

मानिसहरुलाई नभई नहुने खानेपानी शौचालय जस्ता अत्यावश्यक बस्तुको समेत व्यवस्थापन नहुँदा कार्यरत प्रहरी कर्मचारीहरुले शौचालयका लागि छिमेकीको भर पर्नुपरेको हो । खानेपानी, शौचालय जस्तो कुरा समेत मागेर चलाउनु लज्जाको विषय बनेको छ ।

कार्यालय स्थापना भएको बर्षौं भैसकेको छ । धेरै मन्त्री, प्रहरी प्रमुखहरु परिवर्तन भए तर चोकमा लठी समाएर बस्ने प्रहरीको अवस्था भने अझै उस्तै छ ।
बाहिरबाट हेर्दा र देख्दा साना लाग्ने तर जनताको शान्ति सुरक्षामा महत्वपूर्ण भूमिका रहने कार्यालयहरु न्यूनतम कुराहरु नपाएर मागेर चलाउँछन् भन्दा अचम्म लाग्न सक्छ । बुटबल उप–महानगरपालिका मुख्य बजार भित्रका ३ वटा प्रहरी कार्यालय (बिट) जहाँ एउटा कार्यालयमा ६ जनाको सख्यामा प्रहरी खटिदै आएका छन् ।

ट्राफिक चोक प्रहरी बिट, अमरपथ प्रहरी बिट, राजमार्ग चौराहा प्रहरी बिट तीनवटैमा न त खानेपानी धारा नै छ, न त शौचालय नै । यहाँ खटिने प्रहरीले खानेपानी र शौचालयको जोहो छिमेकीको मागेर गर्दै आएका छन् ।

कार्यालयहरुमा दुई तीनवटा पलङ्ग बिस्तारा समेत राखिएको छ । रातीमा केही प्रहरी कर्मचारीहरु त्यहीं नै सुत्ने गर्दछन् । रातिमा बस्नेहरुलाई खानेपानी र शौचालय भने अन्यत्र खोज्नु पर्ने हुँदा समस्या छ ।

बुटवल ट्राफिक चोकमा केही समयदेखि खटिदै आएका एक प्रहरीले भने –‘दिउँसोमा त बजार खुल्ला हुन्छ सबै पाईन्छ तर रातीमा भने शौचालय गर्न कि त गोलपार्क कि नेपालगञ्ज रोड, कि लुम्बिनी प्रादेशिक अस्पताल जानुको विकल्प छैन ।’

उनले धेरै समस्या रहेको भन्दै खानेपानी धारा र शौचालय नभएको र धुलोले लगाउने कपडा बाहिर राख्ने अवस्था नै नभएको समेत बताए । कपडा धुलोका कारण पलाष्टिकले बेरेर राख्नुपर्ने बाध्यता समेत रहेको उनको भनाई छ । ‘बाहिर राखे लगाउनै मिल्दैन, खानेपानी र शौचालय नहँुदा रातीमा कहिले काँही साह्रै दुःख पाउनु परेको छ’ उनले भने ।
कहीलेकाँही मोटरसाईकल लिएर शौचालय जानुपरेको एक प्रहरीको गुनासो छ । इलाका प्रहरी कार्यालय बुटबलका प्रमुख प्रहरी नायब उपरीक्षक दान बहादुर थापाले अस्थायी रुपमा स्थापना गरिएको हुँदा केही ब्यवस्थापन गर्न कठिनाई भैरहेको बताउँछन् । केन्दीय सरकार, प्रदेश सरकार, स्थानीय सरकारको सहयोगमा स्थायी दरबन्दी निकासा नहुँदा र प्रविधियुक्त स्थायी संरचना निर्माण गरेर प्रहरी चौकी लैजानुपर्ने उनको भनाई छ । प्रमुख थापाले भने–‘समस्या धेरै छन्, विस्तारै समाधान गरेर लैजानुको विकल्प छैन, आशावादी हुनुपर्दछ ।’