खोज

कपिलवस्तु, २७ पुस ।

साहित्यकार हरिराज शर्मा (हरास) को अठारौं कृती आत्मपरक निबन्ध “टाईम पास” बिमोचन गरिएको छ । तौलिहवाको राधाकृष्ण मन्दिरमा आयोजित कृति बिमोचन समारोहमा कपिलवस्तु साहित्यिक समाजका अध्यक्ष पशुपतिमणी त्रिपाठी, बार एशोशिसनका पुर्व जिल्ला अध्यक्ष अधिवक्ता हुम बहादुर कुवर र कपिलवस्तु बहुमुखी क्याम्पसका प्रमुख डाक्टर बिनय पाण्डेयले सामुहिक रुपमा कृतीको बिमोचन गरेका हुन् ।

प्रकाशित कृतीमा निबन्ध, कथा, हाईकु र कविता मार्फत विचार र भावना अभिव्यक्त गरिएको साहित्यकार पार्वती शर्माले बताईन् । साहित्यले समाजका हरेक आयामहरु जोडेको स्पष्ट पार्दै धर्म र ग्रन्थहरु समेत साहित्य सँग जोडिएको उनको प्रष्टोक्ति थियो । कृति विमोचनका क्रममा कृतिकारको परिचय दिदै राष्ट्रिय छन्दबादी समाजका केन्द्रीय अध्यक्ष साहित्यकार ऋषीकेशव भारद्वाजले साहित्यकार हरासलाई सिद्धहस्त कविको उपमा दिए ।

हारसको पहिलो खण्डकाव्य “कल्पना” प्रकाशत भएको स्मरण गर्दै अठारौं कृति सम्मले साहित्यिक जगतलाई धेरै उपहारहरु दिएको उनको प्रष्टोक्ति थियो । कृति समीक्षाका क्रममा समाजसेवी रामअचल यादवले हरासले साहित्यकै माध्यमबाट कपिलवस्तु र यहाँको संस्कृती चिनाउन योगदान दिएको बताए । कार्यक्रममा बाल श्रष्टा जेनिशा कंडेल, साहित्यकारहरु ऋषीकेशव भारद्वाज, भानु चर्तुवेदी, निरा कोरी, शकुन्तला पौडेल, गिता त्रिपाठी, निरु सिंह रायमाझी, श्याम प्रकाश श्रीवास्तव, भोला प्रसाद बिश्वकर्मा र गोविन्द धवल लगायतले आ–आफ्नो रचना वाचन गरेका थिए । आफु पारिवारिक भ्रमणका क्रममा अमेरिका रहँदा सो कृति तयार पारेको साहित्यकार हरिराज शर्मा (हरास) ले जानकारी दिए ।

७० वर्षीय साहित्यकार शर्माको कल्पना, ज्योत्सना, परिणति, कन्यादान, संस्कार खण्डकाव्य प्रकाशन भएका छन् । त्यसैगरी अरुणोदय बाल कविता, अभिव्यक्ति एवं परिवेश, हाईकु कविता संग्रह, लामो कविताः लामो कपाल, मनको व्यथा, मालिका महिमा, संगिता लगायतका लामो कविता संग्रहसँगै पारालिगलकय ककहरा अवधी कविता, यादें हिन्दी कविता संग्रह, श्रद्धान्जली शोक काव्य, अमेरिकामा एक सय अस्सी दिन र बन्दना (लकडाउन) कविता संग्रह प्रकाशित भैसकेका छन् ।