खोज

दाङ, २५ पुस ।

घोराही –१० उत्तर अम्रैका सबिता चौधरी स्नातक पहिलो वर्षमा अध्ययन गर्दै छिन् । पत्रकारितामा रुची भएको तर तालिमको अबसर नपाएकी सविता पत्रकारितामा धेरै रुचि भएको बताइन् । थारुहरु पछाडि परेको कुरा थाहा पाउने र कसरी अगाडि बढाउने भन्ने कुरामा आवाज उठाउने बिचार भएको उनको भनाई छ । “रेडियो, टेलीभिजनमा देखिने महिलाहरु देख्दा कसरी यस्तै बन्ने भन्ने चासो लाग्छ ”त्यसैले तालिम लिन आएको, उनले भनिन् ।

तुलसीपुर उपमहानगरपालिका १५ कन्जवारीका निसा चौधरी अहिले कक्षा ८ मा अध्ययन गर्दैछिन् । उनलाई अरुले लेखेको समाचार पढ्न धेरै मन पर्छ । रेडियोमा समाचार पढेको सुन्दा आनन्द लाग्छ । तर आफूलाई त्यसको बारेमा केही पनि जानकारी थिएन । पत्रकारिता पेसामा आउनका लागि सामान्य जानकारी पनि नभएका कारण उनलाई आधारभूत तालिम लिन मन लागेको थियो । घोराही उपमहानगरपालिकाको आर्थिक सहयोगमा थारु पत्रकार संघ दाङ शाखाको आयोजनामा दाङको घोराहीमा संचालन भैरहेको चार दिने आधारभूत तालिममा उनी सहभागी भएकी छन् ।

घोराही –१७ गुलरियाका समीर चौधरी कक्षा ११ मा अध्ययन गरिरहेका छन् । रडियोमा अरुले समाचार पढेको सुन्दा त्यस्तै बोल्न पाए हुन्थ्यो भन्ने रहर लागेको उनले बताए । तालिमपछि पत्रकारिता पेसा अपनाउने विचार गरेको उनले बताए ।
मिडियामा थारु समुदायका पत्रकारको पहुँच बढाउन तथा पूर्ण समावेशी सञ्चारको लक्ष्यलाई सार्थक बनाउन दाङको घोराहीमा थारु समुदायका युवाहरुका लागि ४ दिने आधारभूत पत्रकारिता तालिम सोमवारबाट सुरु भएको छ । घोराही उपमहानगरपालिकाका नगरप्रमुख नरुलाल चौधरीले थारु समुदायका युवाहरु पढेलेखेका भए पनि पढाई पश्चात कुन क्षेत्र रोज्ने भन्नेमा अन्यौलता रहेको हुँदा समुदायको उत्थानका लागि पत्रकारिताको आधारभूत ज्ञान हासिल गर्न सकेमा यसले धेरै फाईदा पुग्ने बताए । सकारात्मक सोँचका साथ जिम्मेवार नागरिकका रुपमा काम गर्ने वातावरण बनाउन पत्रकारिताको माध्यमबाट गर्न थालिएको प्रयासले सार्थकता पाउने उनको विश्वास छ ।

घोराही उपमहानगरपालिकाका प्रमुख प्रशासकीय अधिकृत भोजराज घिमिरेले पत्रकार भनेको समाजको ऐना भएको बताए । समाज जस्तो हुन्छ त्यस्तै समाचार बन्छ । त्यसैले पत्रकारको कलमले समाजको प्रतिनिधित्व गर्नेभएका कारण केही गरौ भनेर अगाडि आएका युवाले समाजलाई परिवर्तन गर्नमा सकारात्मक भूमिका खेल्ने बताए ।

थारु युवाहरुलाई पत्रकारिताको आधारभूत ज्ञान दिन तथा थारु समुदायको उत्थानमा पत्रकारिताका माध्यमबाट मिडियामा पहुँच बढाउन तालिम दिन थालिएको थारु पत्रकार संघ दाङका अध्यक्ष नविन चौधरीले बताए ।

थारु समुदायमा रहेको पछौटेपन अन्त्य गर्दै सचेतना फैलाउने उद्देश्य पूरा गर्न थारु समुदायका ४० जना युवाहरुलाई आधारभुत पत्रकारिता तालिम दिन थालिएको उनले बताए ।