सामग्री खोज्नुहोस्

भैरहवा ।
भैरहवामा शनिबार राष्ट्रिय स्वतन्त्र पार्टीका वरिष्ठ नेता तथा काठमाडौँ महानगरका पूर्व मेयर बालेन शाहको स्वागतमा समर्थकहरूको उल्लेखनीय भिड देखिएको थियो। घन्टौंदेखि कुरेर बसेका समर्थकहरूले “अब बालेनलाई नै जिताउनुपर्छ”, “मासु भात खाने हो, घन्टीमा भोट हाल्ने हो” जस्ता नाराबाजी गर्दै समर्थन जनाएका थिए। उनीहरूले पुराना दलहरूलाई पछि पार्दै नयाँ नेतृत्वलाई प्राथमिकता दिनुपर्ने धारणा व्यक्त गरे।

समर्थकहरू बालेनको एक झलक हेर्न आतुर थिए । लामो प्रतीक्षापछि बालेन छोटो समयका लागि उपस्थित भई घन्टी बजाउँदै र हात हल्लाएर समर्थकलाई अभिवादन गर्दै अघि बढेका थिए। छोटो उपस्थितिमै समर्थकहरू उत्साहित बनेका थिए।

गौतमबुद्ध अन्तर्राष्ट्रिय विमानस्थल हुँदै मर्चवारबाट रुपन्देही यात्रा सुरु गरेका बालेन लुम्बिनी हुँदै कपिलवस्तुतर्फ लागेका थिए। कपिलवस्तुमा यसअघि नै पार्टी नेतृत्वको भ्रमण कार्यक्रम चलिरहेको थियो। तर बालेन बीचमा कतै नरोकी अघि बढेपछि त्यहाँ बिहानैदेखि प्रतीक्षामा बसेका केही स्थानीय कार्यकर्ता तथा समर्थकहरू खिन्न बने। उनीहरू पहिलेको कार्यक्रम अनुसार सम्बोधन सुन्ने आशामा रहे पनि भेटघाट नभएपछि असन्तुष्टि व्यक्त गरेका थिए।

बालेनको निजी सचिवालयका अनुसार रुपन्देही–कपिलवस्तु–नवलपरासी केन्द्रित भ्रमण तालिका अन्तर्गत मार्चवारी मन्दिर, लुम्बिनी पर्सा चोक, तौलिहवा, बहादुरजंग, चन्द्रौटा, कपिलवस्तु ४ नं।, भैरहवा, धकधई, परासी चोक बेलासपुर, गोपीगञ्ज, बेलाटारी, कुडिया, बर्दघाट र बुटवल देवीनगर पुग्ने कार्यक्रम तय गरिएको थियो। व्यस्त कार्यतालिकाका कारण कतिपय स्थानमा छोटो उपस्थितिमै टोली अघि बढेको सचिवालयले जनाएको छ।

समग्रमा, बालेनको भ्रमणले समर्थकहरूमा उत्साह र अपेक्षा दुवै देखिएको छ । एकातिर नयाँ नेतृत्वप्रतिको समर्थन, अर्कोतिर प्रत्यक्ष संवादको चाहना स्पष्ट रूपमा झल्किएको छ।