सामग्री खोज्नुहोस्

जितपुर (कपिलवस्तु)  ।

जिल्ला प्रहरी कार्यालय कपिलवस्तुको आयोजना तथा इलाका प्रहरी कार्यालय पिपराको समन्वयमा बाणगंगा नगरपालिका–२ स्थित मनकामना संस्कृत विद्यापीठ गुरुकुल, कैलास आश्रम नन्दनगरमा अध्ययनरत बटुकहरूका लागि खाद्यान्न सामग्री  कार्यक्रमका प्रमुख अतिथि तथा  प्रहरी महानिरीक्षक दानबहादुर कार्कीले वितरण  गरेका थिए ।

कार्यक्रम मार्फत गुरुकुलमा अध्ययनरत बटुकहरूको शैक्षिक तथा दैनिकी व्यवस्थापनमा सहयोग पुग्ने विश्वास व्यक्त गरिएको छ ।

खाद्यान्न वितरण कार्यक्रममा सम्बोधन गर्दै  प्रहरी महानिरीक्षक कार्कीले संस्कृत शिक्षा, गुरुकुल परम्परा र नैतिक शिक्षाले समाजलाई सुसंस्कृत र अनुशासित बनाउन महत्त्वपूर्ण भूमिका खेल्ने बताएका थिए ।

उनले गुरुकुलमा अध्ययन गर्ने बटुकहरू भविष्यका संस्कारयुक्त नागरिक भएको उल्लेख गर्दै राज्य र समाजले यस्ता शैक्षिक संस्थालाई संरक्षण र प्रवर्द्धन गर्नुपर्ने आवश्यकता औँल्याएका थिए ।

कार्यक्रमको अवसरमा प्रहरी महानिरीक्षक कार्कीले गुरुकुल परिसरमा श्रीखण्डको वृक्षारोपण समेत गरेका थिए । वृक्षारोपण गर्दै उनले वातावरण संरक्षण आजको आवश्यकता भएको बताउँदै धार्मिक तथा शैक्षिक संस्थाहरूले हरियाली प्रवर्द्धनमा अग्रसरता लिनुपर्ने धारणा व्यक्त गरेका थिए ।

कार्यक्रममा जिल्ला प्रहरी कार्यालय कपिलवस्तुका प्रहरी प्रमुख, इलाका प्रहरी कार्यालय पिपराका प्रमुख, गुरुकुल व्यवस्थापन समिति, गुरुजन, बटुकहरू तथा स्थानीय समाजसेवीहरूको उल्लेखनीय उपस्थिति रहेको थियो ।

गुरुकुल व्यवस्थापन पक्षले नेपाल प्रहरीको यस सहयोगप्रति आभार व्यक्त गर्दै यस्ता कार्यक्रमले संस्कृत शिक्षा र गुरुकुलको संरक्षणमा सकारात्मक सन्देश जाने विश्वास व्यक्त गरिएको  छ।